هەژمارەكا پڕۆژەیێن وەبەرهێنانێ و كارگەهان دێ هێنە بجهئینان
ب سەرپەرشتیا د. عەلی تەتەر، پارێزگارێ دهۆكێ دوهی 7/5/2025 كۆمبوونا لیژنا پیشەسازی و گەشەپێدانێ هاتە ئەنجامدان و تێدا بەحسێ رەوشا كەرتێ پیشەسازی و وەبەرهێنانێ و داخوازیێن سەرمایدار و وەبەرهێنەران ل سنۆرێ پارێزگەهێ، وەكو دانانا كارگەهان و دورستكرنا پڕۆژەیێن وەبەرهێنانێ د كەرتێن جودا دا هاتە كرن.
پاشی گەنگەشێن تێر و تەسەل ل سەر هەموو داخوازیان هاتنە كرن و پتریا وان هاتنە پەسەندكرن.
پارێزگارێ دهۆكێ دوپاتكر، هەر داخوازی و پڕۆژەكێ هاتیە دەستنیشانكرن و پەسەندكرن، دڤێت ل دووڤ رێنما و یاسایێن حكومەتا هەرێما كوردستانێ بهێتە دورستكرن و د بەرژەوەندیا گشتی یا وەلاتییان دا بیت و زیانێ نەگەهیننە ژینگەهێ و پشتەڤانیا كارگێریا پارێزگەهێ بۆ هەر هاریكاریەكێ دیاركر.
دیسا هەر دوهی 7/5/2025 د. عەلی تەتەر، پارێزگارێ دهۆكێ پێشوازیا چەندین كەسایەتی و بازرگان و پیشەسازێن باكوورێ كوردستانێ كر، كو ژ حەجی عەلی ئەرتاش و تاهر ئەرتاش و حەجی تەوفیق یاییلا ژ پارێزگەها وانێ و دەوروبەرێن وانێ پێكهاتبوون.
د هەڤدیتنەكێ دا بەحسێ رەوشا دەڤەرێ ژ روویێ جڤاكی و لێكگوهۆڕینا بازرگانی د ناڤبەرا هەرێما كوردستانێ و خەلكێ باكوورێ كوردستانێ و چاوانیا پێشئێخستنا وان هەموو جۆرە پەیوەندییان د ناڤبەرا وەلاتیێن پارێزگەها دهۆكێ و خەلكێ باكوورێ كوردستانێ، ب تایبەتی وەلاتیێن وانێ دا هاتە كرن.
