هەژمارەكا گونـد و گەڕەكـێن ئاكرێ د بێ ئاڤن
رەمەزان زەكەریا:
ل سنۆرێ دەڤەرداریا ئاكرێ و ناوچەداری و گوندێن دەردۆر ل دەستپێكا وەرزێ هاڤینێ تووشی ئاریشەیا كێمئاڤیێ بووینە.
ئەندازیار زرار ئەحمەد، رێڤەبەرێ ئاڤا ئاكرێ بۆ ئەڤرۆ گۆت: «ل سەنتەرێ دەڤەرداریا ئاكرێ، ئاریشەیا كێمئاڤیێ ل گەڕەكێن كەڤن نینە، لێ ل هندەك گەڕەكێن نوو ئاریشەیا كێمئاڤیێ هەیە، لێ پتریا وان ئاریشەیێن دەمكینە و دهێنە چارەسەركرن، ئەگەر چارەنەبوون، ب رێكا تانكەرا ئاڤ بۆ دهێتە دابینكرن».
ناڤهاتی گۆتژی: «ل سنۆرێ ناوچەداریا دینارتە، چار پێنج گوندان ژێدەرێ ئاڤا وان كێمبوویە و هندەكان ژی هشكبوویە و ب رێكا تانكەران ئاڤ دگەهیتێ، سەنتەرێ ناوچەداریێ ژی ئاڤ ب رێكا تانكەران بۆ دهێتە دابینكرن، ل سنۆرێ ناوچەداریا گردەسێن ژی چەندین گوندان ژێدەرێ ئاڤا وان هشكبوویە، هەروەسا ل سنۆرێ ناوچەداریا بجیلێ ژی ژێدەرێ ئاڤا نێزیكی 22 گوندان ب ئێكجاری هشكبوویە و ب رێكا تانكەران ئاڤ بۆ دهێتە دابینكرن».
