هەڤال عەبدولعەزیز: یارییا بادمینتۆنێ پێدڤی ب پشتەڤانییا یانەیێن پارێزگەهێ یە
د داخویانیەكێ دا سەرۆكێ فیدراسیۆنا بادمینتۆنا ئیراقێ دیار كر ل هەرێما كوردستانێ یارییا بادمینتۆنێ قۆناغێن باش دەربازكرینە پشتی ڤەكرنا چەند خولێن راهێنانێ و دادڤانیێ و چەندین یاریزانێن باش هاتینە پێش بەلگە ژی قارەمانییا رۆژئاڤا ئاسیا ئەوا ل حەفتییا بۆری هەولێرا پایتەخت مێڤاندارییا وێ كری.
زێدەتر هەڤال عەبدولعەزیز كو خەلكێ باژێرێ ئاكرێ و نوكە ژی ئەندامێ لژنەیا بازاركرنێ د فیدارسیۆنا عەرەبی دا بۆ رۆژنامەیا ئەڤرۆ گۆت: د ئەڤان چار سالێن بۆری دا مە ب پلان و بەرنامە بۆ چەند خولێن جودا یێن راهێنەران و دادڤانیێ ل هەرێما كوردستانێ و ئیراقێ ڤەكربوون و شیاین كۆمەكا باش یا گەنجان بینینە دناڤ یاریێ دا و چەندین یاریزانێن خودان شیان هاتینە پێش ئەڤە ژی رامانا وێ ئەوە پێنگاڤێن مە د سەركەفتی بوون و شیاینە بنیاتەكێ باش پەیدا بكەین و بەلگە ژی دووماهی قارەمانییا رۆژئاڤا ئاسیا ل سەر ئاستێ هەلبژارتییان ل هەولێرێ بۆ مە دیار بوو دیسان بوویە جهێ سەرنجراكێشا هەمی پشكداران تایبەت یێن هەلبژارتیێن عەرەبی ژبەر ڤیانا مەزن یا خەلكێ كوردستانێ بۆ وەرزشێ و ناسناندنا جۆگرافی و سرۆشتێ جوان.
ناڤهاتی ئەوچەندە ژی دیاركر ئاستەنگا هەرە مەزن نەبوونا یانەیان و جهێن ئەنجامدانا یاریێ یە و گۆت: ژبەركو یارییا بادمینتۆنێ پێدڤی ب جهەكێ تایبەتە دناڤ هۆلێن وەرزشی دا، هەروەسان یانەك ژی هەبیت پشتەڤانیێ لێ بكەت ژبلی پێدڤیێن وەرزشی كو ئەم دشێن بۆ پەیدابكەین ب باشترین كوالیت، لەوما بۆ ڤێ یەكێ دێ سەرەدانا یانەیێن كوردستانێ تایبەت یێن پارێزگەها دهۆكێ كەین ژبۆ وەرگرتنا پشتەڤانیێ، چنكو ئەڤێ یاریێ جهێ خوە گرتییە و گەنجێن وەرزشڤان پەیدابووینە، ب هیڤینە یانەیێن وەرزشی ژی دگەل مە هاریكاربن.
