هەڤپەیمانیا نێڤدەولەتی پێگەهێ خوە ل باکورێ سووریێ بهێزتر دکەت
ناڤەندا چاڤدێریا مافێن مرۆڤی د راپۆرتەکێ دا دیار کریە، ژ بەر مەترسیا داعشێ و گرۆپێن سەر ب ئیرانێ و شامێ چەند رۆژن هەڤپەیمانیا نێڤدەولەتی یا شەرێ ل دژی داعشێ ب سەرپەرشتیا ئەمریکا پێگەهێ خوە ل هندەک دەڤەرێن ستراتیژی ل باکورێ سووریێ بهێزتر دکەت و ئەو یەک بوویە جهێ دلگرانیا رۆسیا و شامێ.
ناڤەندا چاڤدێریا مافێن مرۆڤی یا سووریێ د راپۆرتەکێ دا دیار کریە، پشتی ئالۆزیێن ڤێ دووماهیێ ل باژێرێ حەسەکێ یێ رۆژئاڤایێ کوردستانێ، مەترسیا بهێزبوونا داعشێ و گرۆپێن دی یێن تیرۆرستی ل باکورێ سووریێ زێدەتر بوویە، ژ بەر هندێ ژی هەڤپەیمانیا نێڤدەولەتی یا شەرێ ل دژی داعشێ ب سەرپەرشتیا ئەمریکا دەست ب هندەک گوهۆڕینێن مەزن کرینە، هەڤپەیمانیا نێڤدەولەتی ل دەوروبەرێن حەسەکێ و هندەک دەڤەرێن دی یێن ستراتیژی خوە بجه کرینە و دەست ب ئاڤاکرنا هندەک بنگەهێن نوو یێن سەربازی ژی کرینە، چونکی مەترسیەکا مەزن یا هەی دیسان داعش ل هندەک دەڤەران دەست ب کریارێن تیرۆرستی بکەت.
هەمان ناڤەندێ ئەو یەک ژی دیار کریە، رۆسیا و شام ل هەمبەر بزاڤێن ڤێ دووماهیێ یێن هەڤپەیمانیا نێڤدەولەتی یا شەرێ ل دژی داعشێ دلگرانن، چونکی دەمەکە رۆسیا کار بۆ هندێ دکەت دا ئەمریکا هەموو هێزێن خوە ژ ئاخا سووریێ ڤەکێشیت، لێ پشتی روودانێن ڤێ دووماهیێ ل دێرازۆرێ ئەمریکا یێ پێگەهێ خوە ل باکورێ سووریێ و رۆژهەلاتێ فراتێ بهێزتر دکەت و ئەو یەک ژی بوویە جهێ دلگرانیا رۆسیا و رژێما بەشاری.
ئەو یەک د دەمەکێ دایە کو بەری دەمەکێ فەرماندارەکێ ئەمریکی ل سووریێ راگەهاند، رۆسیا و ئیران دخوازن ب رێیا هندەک گرۆپێن چەکدار ئێرشی هێزێن وان ل باکورێ سووریێ بکەن، ئارمانجا سەرەکی یا رۆسیا و ئیرانێ ئەوە دا چو هێزێن ئەمریکا ل سووریێ نەمینن، لێ ئەو یەک ب چو رەنگەکێ ناهێتە قەبوول کرن، چونکی ل سووریێ مەترسیا داعشێ و گرۆپێن دی یێن تیرۆرستی هەیە، هەتا ئەو مەترسی ژی هەبیت ئەمریکا نەچارە ل سووریێ بمینیت.
ل ئالیێ دی بەری دو رۆژان سیرگێی لاڤرۆڤ وەزیرێ دەرڤە یێ رۆسیا ژی راگەهاند، هەتا هێزێن ئەمریکا و هێزێن دی یێن بیانی ل سووریێ بمینن رەوشا وی وەلاتی ئارام نابیت، ژ بەر هندێ ژی دڤێت د پێنگاڤا ئێکێ دا ئەمریکا و وەلاتێن دی یێن بیانی هەموو هێزێن خوە ژ ئاخا سووریێ ڤەکێشن و رێزێ ل سەروەریائاخا سووریێ بگرن، ئەمریکا ب بەهانا شەرێ ل دژی تیرۆرێ دڤێت بۆ دەمەکێ درێژ ل سووریێ بمینیت، ئەمریکا قانوونێن نێڤدەولەتی بنپێ دکەت، مانا هێزێن ئەمریکا ل باکورێ سووریێ و هندەک دەڤەرێن دی ئالۆزیێن هەی دژوارتر لێ دکەت، ژ بەر هندێ ژی دڤێت ئەمریکا هێزێن خوە ژ سووریێ ڤەکێشیت.
