هەکـە رێککـەفتن نەهێتە کـرن دێ ئیران تووشی قەیرانەکـا مـەزن بیت
چاڤدێرەکێ سیاسی دیار دکەت، هەکە بەرپرسێن ئیرانێ وەسا هزر بکەن دشێن تنێ ب رێیا کارتا دەرتەنگا هورمز ئەمریکا نەچار بکەن داخوازیێن وان قەبوول بکەت ئەو یەک گەلەک شاشە و ئەمریکا دشێت ل گەل هەڤپەیمانێن خوە ئیرانێ گەلەک تەنگاڤ بکەت.
جەلیل ئازادیخواه چاڤدێرێ سیاسی ل ئەمریکا دیار کر، دیارە بەرپرسێن ئیرانێ وەسا هزر دکەن دشێن بۆ دەمەکێ بابەتێ دەرتەنگا هورمز بکار بینن و وەسا ئەمریکا نەچار بکەن هندەک ژ داخوازیێن وان قەبوول بکەت، ئەو یەک شاشیەک گەلەک مەزنە و وەسا دیارە کو ئەمریکا ستراتیژیەکا دەمدرێژ ل دژی ئیرانێ هەیە و گۆت: (وەسا دیارە ئەمریکا دێ دۆرپێچەکا مەزن یا ئەسمانی دانیتە سەر ئیرانێ و هەروەسا ئەمریکا دێ کار کەت دا بشێت هەڤپەیمانیەکا گەلەک بەرفرەه ل دژی ئیرانێ دروست بکەت).
ناڤهاتی ئەو یەک ژی دیار کر، بابەت تنێ ئەو نینە، نها رەوشا ئابووری یا ئیرانێ گەلەک خراب بوویە، ژ بەر شەڕێ ڤێ دووماهیێ ژی زیانێن گەلەک مەزن گەهشتینە ژێرخانا ئابووری و وزێ ل ئیرانێ و ژ بەر ڤێ یەکێ ژی هەکە رێککەفتن نەهێتە کرن و سزایێن ئابووری یێن ل سەر ئیرانێ ژی توندتر لێ بهێن دێ رەوش بۆ ئیرانێ گەلەک خرابتر لێ هێت و خەلکێ ئیرانێ ژی نەشێن بۆ دەمەکێ درێژ رەوشا هەی قەبوول بکەن و گۆت: (دبیت جارەکا دی دەنگێ نەرازیبوونێ د ناڤ ئیرانێ دا بلند ببیت، رەوشا ئابووری دەمێ خراب بیت دێ خەلک ل دژی دەستهەلاتێ خوەنیشادانان کەن و هەکە ئەو یەک بهێتە کرن دێ ئیران تووشی کارەساتێن گەلەک مەزن بیت و ژ بەر ڤێ یەکێ ژی دیارە ئەمریکا کار ل سەر گەلەک بژاردەیێن جودا ل دژی ئیرانێ دکەت).
ل ئالیێ دی گەلەک ژ چاڤدێرێن سیاسی ژی وەسا دبینن ئەمریکا بەری ئێرشا ئیرانێ بکەت پێدڤی بوو بەرهەڤی بۆ گەلەک تشتان کربا، نها ئیران وەسا هزر دکەت دشێت ب دائێخستنا دەرتەنگا هورمز ئەمریکا نەچار بکەت دا گەلەک ژ داخوازیێن وێ قەبوول بکەت و ژ بەر ڤێ یەکێ ژی د دانوستاندنێن ل پاکستانێ دا ئیران بەرهەڤ نەبوو ژ بۆ بابەتێ یۆرانیۆمێ و هەروەسا دەرتەنگا هورمز بریارەکا وەسا بدەت کو ب دلێ ئەمریکا بیت و هەکە ئەمریکا یا پێدڤی ل دژی ئیرانێ نەکەت دێ ئەو یەک بیتە جهێ دلگرانیا هەڤپەیمانێن ئەمریکا ل دەڤەرێ، ب تایبەتی ژی نها وەلاتێن عەرەبی دلگرانن کو ئەمریکا و ئسرائیلێ نەشیان رژێما ئیرانێ بگوهۆڕن و مانا رژێما نها یا ئیرانێ دشێت ئاریشەیێن گەلەک مەزن بۆ ئەمریکا و هەڤپەیمانێن وێ ل رۆژهەلاتا ناڤین دروست بکەت و هەکە ئەو یەک نەهێتە کرن دێ گەلەک تشتێن نەچاڤەرێکری ل دەڤەرێ روو دەن.
