هەکە ئافره‌ت یا هشیار بیت ئەو نیڤا جڤاكی یا هشیاره
هه‌ولێر، قائید میرۆ:
به‌رپرسا ڕاگەهاندنا ئێكه‌تیا ئافره‌تێن كوردستانێ بۆ ڕۆژنامەیا ئەڤرۆ دیار کر، رێژه‌یا بكارئینانا ماددێن بیهۆشكه‌ر ل ده‌ف ئافره‌تان كێمتره و گۆت: هشیارکرنا ئافره‌تێ یا گرنگه و پڕانیا وان ئافره‌تێن تووشی بكارئینانا ماددێن بێهۆشكه‌ر بووین لژێر كاریگه‌ریا زه‌لامان بوویه.
لیا سه‌یفه‌دین، به‌رپرسا ڕاگه‌هاندنا ئێكه‌تیا ئافره‌تێن كوردستانێ دیار کر کو حه‌فتیا بۆری ئێكه‌تیا ئافره‌تێن كوردستانێ كۆنفرانسه‌ك لدور ماددێن بێهۆشكه‌ر ب ڕێڤه بر و تێدا هه‌شت ڤه‌كۆلین هاتنه پێشكێشكرن لدور كاریگه‌ریێن ماددێن بێهۆشكه‌ر لسه‌ر جڤاكی، بتایبه‌تی ژی لسه‌ر ته‌خا ئافره‌تان و گۆت: مه‌ره‌م ژ هه‌وا ئێكه‌تیا ئافره‌تێن كوردستانێ و ئه‌نجامدانا كۆنفرانسی ئه‌و بوویه ئافره‌ت بهێنه هشیاركرن لسەر مه‌ترسیێن ماددێن بێهۆشكه‌ر، داکو ئافره‌ت نه‌كه‌ڤنه بن كاریگه‌ریا ده‌ستهه‌لاتا زه‌لامان بۆ بكارئینانا ماددێن بێهۆشكه‌ر و چو گڤاشتن نه‌بنه ئه‌گه‌رێ بكارئینان و بازرگانیا ماددێن بێهۆشكه‌ر ژلایێ ئافره‌تانڤه.
لیایێ دیار کر ژی، راسته به‌ری نوکە ژی بكارئینان و بازرگانیا ماددێن بێهۆشكه‌ر ل ده‌ف ئافره‌تان هه‌بوو، به‌لێ دگه‌ل وان گۆهۆڕینێن چێبووی رێژه‌یا بكارئینان و بازرگانیێ زیده بوویه و گۆت: ل گوره‌ی ئامارێن به‌رده‌ست هژماره‌ك ژوان ئافره‌تێن ب تۆمه‌تا ماددێن بێهۆشكه‌ر هاتینه حوكمکرن ل چاكسازیێن هه‌رێما كوردستانێ بیانینه و هنده‌ك ژی ئافره‌تێن نافخۆنه، به‌لێ سه‌ر ئاستێ جیهانێ زێده‌تر زه‌لام ماددێن بێهۆشكه‌ر بكاردئینن و رێژا ئافره‌تێ زۆر كێمتره.
لیایێ زێدەتر گۆت: ئێك ژ وان ئه‌گه‌رێن بوویه پالدەر ئافره‌ت ماددێن بێهۆشكه‌ر بكاربینیت ئه‌و خێزانن یێن ئێکودو تەلاق دای و جودا بووین، یانژی زارۆكێن وان لێ دوور كه‌فتین، رێژه‌یا بكارئینانێ زێده‌تر ل ده‌ف وان ئافره‌تانه یێن خێزان پێكئینای.
لیا سه‌یفه‌دین ئاماژه پێكر، ده‌مێ ئافره‌ت هشیار دبن لدور مه‌ترسیێن ماددێن بێهۆشكه‌ر رامانا وێ ئه‌وه نیڤا جڤاكی یا هشیاره ژ مه‌ترسیێن ماددێن بێهۆشكه‌ر و گۆت: ئه‌و ڤه‌كۆلینێن هاتینه ئه‌نجامدان ژلایێ قانوونی و جڤاكی و ئابوری و رۆلێ په‌روه‌ردێ و رۆلێ میدیایێ لسەر هشیاركرنا جڤاكی هاتینه رێڤه‌برن، مخابن زۆری ل ئافره‌تان دهێته‌كرن بۆ بكارئینانا ماددێن بێهۆشكه‌ر و دووڤدا بازرگانی ب ئافره‌تێ دهێته‌كرن، هه‌تا راددێ ده‌ستدرێژیا سێكسی و ژن دهێنه بكارئینان.
لیا، به‌رپرسا ڕاگه‌هاندنا ئێكه‌تیا ئافره‌تێن كوردستانێ د بەردەوامیا ئاخفتنێن خۆدا گۆت: ژ نێزیكڤه مه سه‌ره‌دانا ئافره‌تێن دناڤا چاكسازیان كریه و خۆشحالیڤه هژمارا وان ئافره‌تێن ماددێن بێهۆشكه‌ر بكاردئینن زۆر نینه و ئه‌ڤێن هاتینه سزادان ژی ژلایێ وه‌زاره‌تێن ساخله‌می و كارۆبارێن كۆمه‌لایه‌تی چاكسازی تێدا كریه و جاره‌كادی ڤه‌گه‌ڕاندینه دناڤا جڤاكی، به‌لێ ئه‌م دخوازین هێشتا رێژا بكارئینانێ كێمتر بكه‌ین و هشیاریێن زێده‌تر به‌لاڤ بكه‌ین لدور مه‌ترسیێن ماددێن بێهۆشكه‌ر، ئه‌نجامێن كۆنفرانسی ژی دێ هێنه بلندكرن بۆ لایه‌نێن په‌یوه‌ندیدار.
