هەکە تە نان نەخوار دێ چ روودەت؟
دکتۆرە ناتالیا دێنیسۆڤا بسپۆڕا بوارێ خۆراکی و سەرۆکا ڤەکۆلەران ل سەنتەرێ ڤەکۆلینێن فیدراڵی بۆ خوارنێ و بایۆتێکنۆلۆژیێ هۆشداریێ ددەت ژ دوورخستنا نانی ب ئێکجاری د خوارنێ دا چونکو کاریگەریێن نەرێنی دێ ل سەر ساخلەمیێ پەیدابن.
ئەو تایبەتمەند د چاڤپێکەفتنەکێدا دگەل ماڵپەڕی “ئەیف.رو” ئاماژەدکەت، هێلانا نانی دبیتە ئەگەرێ کێمبوونا هێزێ بۆ کارکرن و چالاکیێن هزری و زێدەبوونا ماندیبوونێ ژ ئەگەرێ کێمیا ڤیتامین B1. ژبلی وێ چەندێ ژی ڕەنگە کێمیا ڤیتامین (PP) لێ پەیداببیت کە پێدڤیە بۆ مێشکی، هەروەسا ڤیتامین B12 کۆ پێدڤیە بۆ دیتنێ.
ئەو نۆشدار هۆشداریێ ددەت کو هێلانا نانی دبیتە ئەگەرێ کێمیا فۆلیک ئەسید، ئەڤەژی دبیتە ئەگەرێ لاوازبوونا بەرگریا لەشی و ژ ئەگەرێ کێمیا رویشالێن خوارنێ ژی، کارکرنا کۆئەندامێ هەرسێ تێکدچیت، ئاماژە ب وێ چەندێ ژی کر کو خوارنا نانی ب شێوەیەکێ مامناوەند هاریکارە بۆ باشترکرنا ساخلەمیا کۆئەندامێ هەرسێ.
ئەو تایبەتمەند ئامۆژگاریا خوارنا نانێ ڕەش دکەت، کو زێدەتر پێدڤیا رۆژانەیا لەشی دابین دکەت کو پێکهاتیە ژ ڤیتامین B1 و E و مەگنسیۆم و فسفۆر، هەروەسا رێژەکا باش یا ئاسنی تێدایە کو ٧٨٪ێ پێدڤیا رۆژانەیا لەشی ب ڤی توخمی یە، هەبوونا ترشیێ فۆلیک هاریکاریا هەلمژینا ئەوان کانزایان ددەت ب باشی، هەروەسا زەنگینە ب ڤیتامین B2 و PP و کالسیۆمی،
ب گۆتنا وێ، ١٠٠ گرامێن نانی ٣٠ بۆ ٣٥ میلیگرامێن سیلینیۆمی تێدانە کو زێدەترە ل نیڤا پێدڤیا رۆژانەیا لەشی ب ڤی توخمی دابین دکەت، ئاماژەکر، تووشبوویێن شەکرێ و ئەوێن هەولا کۆنترۆلکرنا کێشا خۆ ددەن دشێن بخۆن، چونکو رێژەیەکا بلند یا رویشالێن خۆراکی تێدایە، ئەڤەژی هەستکرن ب تێربوونێ بۆ دەمەکێ درێژ مسۆگەر دکەت و نابیتە ئەگەرێ بلندبوونا ئاستێ گلوکۆز د خوینێ دا.
