هەکە دەنگێ بەلێ سەركەفت دەملدەست دێ سەربەخۆیێ راگەهینن
ئەڤرۆ نیۆز،زنار تۆڤی:
ئەڤرۆ سێشەمبێ لیستا هەڤپەیمانیا دەستهەلاتدار ل هەرێما كەتەلۆنیا راگەهاند هەکە ریفراندۆمێ زۆرینەیا دەنگێ بەلێ ب دەستڤە ئینا،دێ هەرێما وان راستەوخۆ پشتی ئەنجامدانا ریفراندۆمێ دێ سەربەخۆیێ راگەهینن.
گابریێلا سیرا ئەندامێ لیستا هەڤپەیمانیا سەربەخۆ خواز ل هەرێما كەتەلۆنیا راگەهاند هەکە وەلاتیێن كەتەلۆنیا ب زۆرینەیا دەنگان پشتەڤانیا خوە بۆ دامەزراندنا كۆمارا كەتەلۆنیا راگەهاند،ئەو دێ دەملدەست سەربەخۆیێ راگەهنین.
لیستا هەڤپەیمانیا سەربەخۆ خواز یا كەتەلۆنیا، زۆرینەیا پەرلەمانتارێن بەرشلۆنە پێك دئینیت و بریارە ل دوماهیا هەیڤا تەباخێ دەنگ ل سەر ڤی پرۆژە بڕیارێ بهێتەدان، بۆ هندێ کو ل هەیڤا چریا ئێکێ دا ریفراندۆمێ ئەنجام بدەن.
ماوەیەكێ زۆرە هەرێما كەتەلۆنیا داخوازا سەربەخۆیێ دکەت،كو هژمارا خەلکێ وێ 7.5 ملیۆن كەسن و هەرێمەکا دەولەمەندا ئیسپانیایە، زمان و كولتوورێ تایبەت ب خوەڤە هەیە.
هەتا نوکە شاهنشینا ئیسپانیا ل مەدرید ب توندی هەولا سەربەخۆیا كەتەلۆنیا رەت دەكەن و ب هەولەکا ل دژی ئێكپارچەیا ئاخا ئیسپانیا وەسف دكەن.
بەری نوکە دادگەها دەستۆری ل ئیسپانیا، داخوازیەکا پەرلەمانێ كەتەلۆنیا بۆ ئەنجامدانا ریفراندۆمێ رەت كربوو،هەروەسا هۆشداری دابوو دەستهەلاتدارێن وێ هەرێمێ،کو دێ ب ئەگەرێ دەرئەنجامێن ڤێ ریفراندۆمێ دێ روو ب روو بەرپرسیاریەتیەکا مەزن بن.
