هەیڤ
ژ نڤیسینا: ئیدواردۆ گالیانۆ *
هەیڤێ هەتا مرنێ، خەریبییا ئەردی دكر و پشتی گەلەكا دودلیێ. هەیڤێ بڕیار دا، كو ژووردا بەر ب ئەردیڤە بهێت. وێ نیاز بوو ب تنێ بۆ گاڤەكێ ل ئەردی بمینیت، بەلێ دەما دەست ب گەشتا زڤڕینێ بەر ب ئەسمانیڤە كری، دنێڤ چكلێن دارەكێ ڕا ما هلاویستی.
هەیڤێ زانی، كو چ جاران نەشێت خۆ ژ ڕكەها چكلێن دارێ رزگار بكەت، لەوڕا گەلەك دلتەنگ بوو، هەست ب تنێبوونێ كر.
ژ بۆ شانسی، گورگەك ژ كویراهییا دارستانێ دەركەڤت. گورگی شەڤا خۆ ل گەل هەیڤێ بۆراند و گەلەك یاری و حەنەك ل گەل كرن. گلیزانكێن وێڤە كرن و پێكەنینۆكێن خۆش بۆ گۆتن.
بێهنەك مابوو بۆ بەری سپێدێ، گورگی هاریكارییا وێ كر و هەیڤێ خۆ ژ چكلان رزگار كر و بەر ب بلنداهیێڤە زڤڕی.
بەلێ، ئەو ب تنێ نەچوو؛ داكو چو جاران وێ شەڤا وان ب هەڤڕا بۆراندی ژ بیر نەكەت، سێبەرا گورگی دزی و ژ خۆ ڕا بر. هەر ژبەر وێ چەندێ ژی دەما گورگ د لویریت، بەرێ وی یێ ل هەیڤێ و داخوازێ لێ دكەت سێبەرا وی بۆ بزڤڕینیت، بەلێ هەیڤ هەرتم وەسا خۆ دیار دكەت، هەر وەكی یا بێگوهـ بیت.
* ئیدواردۆ گالیانۆ: ل ١٣ێ نیسانا سالا ١٩٤٠ێ ل باژێڕی مۆنتیڤیدیۆ – لا ئۆرۆگوای Montevideo, Uruguay هاتییە سەر دنیایێ. ڤەكۆلەر و رۆماننڤیس و رۆژنامەڤانە و كتێبا وی (دەمارێن ئەمریكا لاتین یێن ڤەكری ) بۆ پتر ژ ٢٠ زمانانان هاتییە وەرگێڕان. ژ ناڤدارترین بەرهەمێن وی: (دەمارێن ئەمریكا لاتین یێن ڤەكری – بیرادنكا ئاگری – كتێبا هەمبێزان – هندەك دەڤ ژ دەمی) . بۆ چەند سالان ژبەر ئەگەرێن سیاسی ژ وەلاتێ خۆ ل ئەرژەنتین و ئیسپانیا هاتبوو دویرخستن. گالیانۆ ب هزر و بۆچوونێن خۆ، پشتەڤانییا وان بزاڤان دكەت یێن ل دژی جیهانگیریێ.
تێكستا عەرەبی ژ سایتێ «الحكواتی» هاتیبە وەرگرتن.
وەرگێڕان ژ عەرەبی: شەمال ئاكرەیی
