هەی.. دنیایێ!
رەمەزان ئیسماعیل گەرەگوهی
دەمێ هێشتا ئەز سیه سال و نەبوویمە چل، دگەل مە دژیان دەیك و باب و داپیرا مە ئەوا دگۆتنێ: (داپیرا گول)، دگەل رەحمەتیێ باپیرێ مە ئەوێ هەمی مەعریفەت و پڕی ئاقل، پێكڤە دژیاین، زێدە زێدە وان ئەم دڤیاین، دگەل هەمی خویشك و برا و كەس و كارا، دخانیەكیڤە ل ناڤبەرا چار دیوارا، ئەڤە هەمی و زێدەباری ب هاتن و ڕێزگرتنا ل مێهڤانا و سەرەدەری دگەل وانا، هەمیا پێكڤە ب جوانی و دلۆڤانی، بهایێ ئێك ب باشی دزانی، هەمی شەڤا ئەم خڕڤە دبووین ل دەوبەرێن كوچكێن پەلا و بخویرییا و سۆپێن دارا، ل شەڤێن درێژێن زستانێ، هەتا دگەهەشتە نیسانێ، شەڤێن گەلەك ب سڕوسەقەم و گەلەك سار، هەمی پێكڤە ب خشكۆكی دڕوینشتین خوار ، هندەكا دار دكرنە سۆپێ و قورم و ئێزنك تێدا دسۆتن، هندا ستران لێ ڤەدگێڕان هندا دگۆتن، هندەكێن دی بێوك وكەزان د كەلۆتن، هندەكا بەڕوی دكەلاندن، هندەكا تۆڤك دقەلاندن، هندا گویز و باهیڤ دشكاندن، جار كابانیێن ئالیێ مالێ، كتكێن هژیرێن وێ سالێ، د گەل مێویژێن ڕەش و زەر، ژ هنبانا دئینانەدەر، د گەل تەخلیتێن هنارا، ژبن ستێڕك و كوارا، دكرنە سێنیكێن فافۆنی ل درەنگی شەڤ ددانانە بەر، داپیرا گول جار و بارا تەشی د ڕست و ساق و گۆرە بۆ مە دكرن، شال و شەپكێن كونبووین بۆ مە ئاڤچی دكرن، دبەر ڕا بەر ڕا بۆ مە هەمیا پێكڤە هیڤی ژ خودێ دخواستن لاڤا دكرن، ل تەقەكێ دگۆتە نەڤیێن خوە: پیرێ گۆری، هیڤی دكەم هەمی دەما دسەرفەراز و سەركەفتی بن، ب كەسایەتی و د ساخلەم و بەركەفتی بن، ژی درێژ و پیر و كال بن، هزار سال بن، زوی نەمرن، كریارێن باش ژ مە فێرببن ژمە وەربگرن، زارۆكان ژی گوهداری دكر دەستێن وانا ماچی دكرن، بسەربلندی و بكەیف و خوەشی پێكڤە دژیاین، دەیك و باب و باپیرێن مە ڕۆژ بۆ ڕۆژێ پتر دڤیاین. باپیرێ مە یێ خواندەڤان و زانابوو، قورئان خوین و نیڤ مەلابوو، خودان هزر و بیروڕابوو، تەمەنێ وی نێزیكێ هەشتێ سالا بوو، ئاڤاهیێ گوند و مالا بوو، چانتكێ وی یێ مەتەلۆكا و ستران و بەیت و چیرۆكا هەمی دەما یێ تژی بوو، خودان دلەكێ پاقژ و گەلەك سپی بوو، من باش دزانی چەندی باش بوو، كا ئەو كی بوو؟ هــەیلا ل منــێ! مـالا مـنـێ! هــەی.. دنـیـایــێ!
