وارتیڤی … ئۆرگانا دهڤهرێ یه
نهسرهت هادی
پشتی كو ل دو ههزار و دویێ سازی یا سپیرێز یا چاپ و وهشانێ ل دهۆكێ دهستویری یا ئاڤاكرنا خوه ژ وهزارهتا رهوشهنبیری یا حوكمهتا ههرێما كوردستانێ وهرگرتی، ب پێشنیازهكا تایبهت یا رێزدار نێچیرڤان بارزانی تهلهڤزیۆنهكا كولتووری یا تایبهت ب دیالیكتا كرمانجی یا گرێدایی دهڤهرێ د ههمان سازی یا ناڤهاتی دا بهێته دانان و ببیته پرهك د ناڤبهرا رهوشهنبیر و نڤیسكارێن دهڤهرێ و دهرڤهیی ههرێمێ دا و وهك ئۆرگانهك خزمهتا كهلتوورا كورد بهێته كرن ـ لێ ئهڤ كاره گهلهك گیرۆبوو و نه هاتهكرن، سهدهم چ بووینه ب ڕاستی نزانم ـ پشتی ههیامهكا درێژ جهنابێ سهرۆك وهزیرێ كوردستانێ سهرهدانا پارێزگهها دهۆكێ كر و د روونشتنهكێ دا د گهل هن ژ رهوشهنبیر و نڤیسكارێن دهۆكێ كو بهرێز تهمهر رهمهزان پارێزگارێ وێ سهردهمێ یێ دهۆكێ ژی ئاماده ببوو، داخواز ژ رێزدار نێچیرڤان بارزانی هاتهكرن تهلهڤزیۆنهكا ب ئاوایێ د وهختێ خوه دا جهنابێ وی ب خوه پێشنیاز كری بۆ دهڤهرێ بهێته دامهزراندن ژبۆ د ری یا وێ تهلهڤزیۆنێ را بێتر خزمهتا كولتوور و رهوشهنبیرێن كورد ب تایبهتی یێن دهرڤه و دهڤهرا بههدینان بهێته كرن، چونكی سهنتهر و سیاسهتا تهڤایا تهلهڤزیۆنێن كوردستانێ ل ههولێر و سلێمانیێ نه و رهوشهنبیر و خهلكێ ڤێ دهڤهرێ ههتا ڕادهیهكێ ژێ دبێ بههرن ـ ئهڤ پێشنیازه دهملدهست هاته پهسهندكرن لێ وهك پرۆژهیهكا كهرتا تایبهت نهیا حوكمهتێ یان پارتیهكێ و یا دروست ژی ههر ئهو بوویه دا كو پتر ئازادیێ ب خوهڤه ببینیت و رهوشهنبیر ژی سامانهكێ نشتمانی یه نه یێ چ ئالیهكی ـ ب راستی ئهڤه بوو جهێ شادبوونا خهلكێ دهڤهرێ و هیڤیێن وانا گهشهكر، ئهو بوو سازیهك ب ناڤێ وار یا پێكهاتی ژ تهلهڤزیۆن، رادیۆ و ڕۆژنامه هاته ئاڤاكرن و خهلكێ دهڤهرێ ژی ب دلسۆزی ل دهردۆرێن سازی یا خوه خرڤهبوون و ب مالا خوه زانی ب ئۆمێدا كو ههمی تهخوچوین .. ئۆل و نهتهوه بێ جوداهی خوه تێدا ببینن ـ لێ مخابن هێژ چ ژیهكێ وهسا دهرباز نهكری قهیرانا دارایی ب سهر ههرێمێ دا گرت و ههر زوی وار سپۆرت كو تهلهڤزیۆنهكا گرێدایی وهرزشێ بوو هاته گرتن و ب دهمهكێ كێم پشتی هینگێ رۆژنامهیا وار ب بههانهیا كو دو رۆژنامهیێن رۆژانه ل دهڤهرێ نه هاته قهباتكرن و رۆژنامهڤانێن وان ب دلهكێ شكهستی ڤهگهریانه مالێن خوه ـ ب ڤێ ژی نه ڕاوهستیا ههر جار ب بههانهیهكێ وار تیڤی یا زێده یه… كارمهند زۆرن.. خهرجی گهلهكه و بێ بهرههم.. ما ئهڤه پهیامه وارتیڤی دایه دهست!! تو خودێ ما ئهڤه رێڤهبرنه پێ دهێته برێڤهبرن یان ما ئهڤه كادره هندی سادهیه تشتهكی ژ میدیایێ نزانن ـ ب ڕاستی ئهم ههمی ئهكادیمینه و چ پرۆفیشنالهكێ (بی بی سی و سی ئێن ئێنێ ) یێ ل بهر دهستێ كادرێن ڤان تهلهڤزیۆنێن دی مهزن بووین، نێ مه ههمیان ژ سفرێ یا دهسپێكری و دهستێن ڤی كادری خۆش كو شیایه بێ سهربوور و بێ شیانێن تهكنینی یێن پێشكهتی بگههیته ئاستا نوكه.. یان ما كێ دهستێ مێرا گرتیه گهر ههر سالێ سهد كادر نه هێنه فرێكرن بۆ ئهورۆپا ژبۆ دیتنا خولێن میدیایی و سهربوورا وان یا پێشكهتی!! مه ل دهسپێكێ بال كشانده سهر وێ یهكێ كو سازی یا وار د بنهكۆك دا پرۆژهیهكا كهرتا تایبهت بوویه و مافێ وانه ژی گوهارتنێن ئیداری، پهیام و ئینان و برنا كادری بكهن و گوههرتن د ههر بیاڤی دا نیشانا پێشكهتن و نویبوونێ یه ـ یا ئهڤرۆ د هێته گۆتن و راسته ژی كو وار تیڤی دێ هێته قهپاتكرن، ب دیتنا من ئهڤه بهردهوامی یا وێ زنجیرا ژێكڤهنهقهتیای یا قوربهسهری یا خهلكێ دهڤهرا دهۆكێ یه كو چ جارا چ حسێب بۆ نههاتیه كرن و یێ ههژی هندێ یه ژی نه ژبهر هندێ كو چ نزانن یان شیان نینن نه! لێ چونكی ئهو ب خوه ل خوه نهبوویه خودان و ههردهم پالێ خهلكهكێ دی بوویه كو مخابن خهلك بۆ خوه ستێرا ژ نهبوونێ چێ دكهن و ئهم ژی ستێرێن خوه یێن ههین و گهش د شكێنین! لهوما بلا گازندا ژ كهسێ نهكهین ئهم سهدهما سهرهكی یا پاشڤهمانا خوهینه ـ ل دووماهیێ هیڤی دارین بریارا گرتنا وارتیڤی هێژ بهێته لیكۆلینكرن، گهر دهستهكا رێڤهبهر نه ل جهێ خوهستێ بیت بلا گوههرتن د ناڤ دا بهێته كرن، یان پهیاما وێ نه ل ئاستا قۆناخا نوكه بیت گهلهك نۆرماله ژبۆ پهیامهكا دلڤهكهر و دراما و هونهری دوور ژ سیاسهتێ بهێته گوههرتن و باوهر دكهم دێ بێتر ب دلێ خهلكێ دهڤهرێ بیت ژ بهر كو ژ ڤی لایی ڤه ئێكجار یێ بێ بههره و هیڤی دارین وارتیڤی وهك ئۆرگانهك ب ناڤێ خوه یێ رهسهن ههر بمینیت كو نهبهس خهلكێ دهڤهرێ، بهلكی كرمانج ژ باكوور، رۆژئاڤا، رۆژههلات و پهنابهرێن ل دهرڤه، سهرهڕای ههر كێماسیهكێ ژی كو چ كار بێ كێمانی نابن لێ گهلهك پێڤه دگرێداینه و یا گرنگ ههر ژ مهدیایێ ژی ئهڤه یه.. ببیه پرهكا راستینه د ناڤبهرا تهخێن جڤاكێ دا.
