وهبهرهێنهرێن بیانی دێ ههژمارهكا پڕۆژهیێن ستراتیژی بجه ئینن
ههولێر، قائید میرۆ:
بهرپرسهكێ دهستهیا گشتیا وهبهرهێنانێ ئاشكرا كر، پشتی سهرهدانا مهسرور بارزانی بۆ ههژمارهكا وهلاتێن جیهانێ بڕیاره وهبهرهێنهرێن بیانی ههژمارهكا پڕۆژێن ستراتیژی یێن وهبهرهێنانێ ل ههرێمێ د بیاڤێن جودا دا بجه بینن.
دكتۆر ههڤال سهدیق، رێڤهبهرێ گشتیێ مۆهلهتدانێ ل دهستهیا گشتیا وهبهرهێنانێ بۆ رۆژناما ئهڤرۆ دیار كر، ههژمارهكا وهبهرهێنهرێن بیانی رازیبوونا خوه دیار كریه بۆ ئهنجامدانا پڕۆژهیێن ستراتیژی یێن وهبهرهێنانێ ل ههرێما كوردستانێ، ب تایبهتی پشتی سهرهدانا مهسرور بارزانی، سهرۆكێ حوكمهتا ههرێما كوردستانێ بۆ ههژمارهكا وهلاتێن جیهانێ و گۆت: “بهردهوام شاندێن بیانی و نوونهرێن وان وهلاتان سهرهدانا دهستهیا گشتیا وهبهرهێنانێ دكهن بۆ وهرگرتنا پڕۆژهیێن وهبهرهێنانێ د ههموو بیاڤان دا، ئهم ژی دخوازین مفای ژ ئهزموونا ههژمارهكا وهلاتێن پێشكهفتی وهربگرین”.
دكتۆر ههڤال سهدیق گۆتژی: “بڕیاره ههژمارهكا پڕۆژهیێن ستراتیژی د بیاڤێن گهشتیاری و چاندن و پیشهسازی و ئاڤاكرنێ دا بهێنه ئهنجامدان، ئهڤ پڕۆژه ل داهاتی ههموو دێ بنه ئهگهرێ گهشهكرنا كهرتێ وهبهرهێنانێ، چونكو پڕۆژێن ستراتیژینه و حوكمهتا ههرێما كوردستانێ ژی بهرههڤیا خوه بۆ وهبهرهێنهرێن بیانی نیشادایه و دێ هاریكاربن بۆ رۆلێ وان د كهرتێ وهبهرهێنانا ههرێما كوردستانێ دا”.
