وه‌رزشڤانێن هه‌ولێرێ ژی بۆچوونێن جودا ل سه‌ر مۆندیالێ هه‌بوون
ئه‌ڤرۆ، هه‌ولێر، سولین سلێمان.
مۆندیالا قه‌ته‌ر 2022ێ دهێته هژمارتن ئێك ژ مۆندیالێن سه‌رنجراكێش تایبه‌ت ژلایێ ئه‌نجامێن نه چاڤه‌ڕێ یێن چه‌ند هه‌لبژارتیێن پشكدار، وه‌رزشڤانێن هه‌ولێرێ بۆچوونێن جودا بۆ رۆژناما ئه‌ڤرۆ دیاركرینه.
ژین محه‌مه‌د گۆلپارێزا یاریا فۆتسالێ گۆت: مۆندیاله‌كا جودایه ژ مۆندیالا 2018 تایبه‌ت ژلایێ پێشڤه‌چوونا ته‌كنۆلۆجیا و بڕیار و رێنومایێن نوو، ژبه‌ركو ئه‌ڤ مۆندیاله ل وه‌لاته‌كێ عه‌ره‌بی یه وه‌كو قه‌ته‌ر باشترین شێوه خوه به‌رهه‌ڤكریه و تا ڕاده‌یه‌كێ مه‌زن یا سه‌ركه‌فتیه بوویه جهێ سه‌رنجراكێشا هه‌موو وه‌لاتان، قاره‌مانیه‌كا بهێزه و ئه‌نجامێن نه چاڤه‌ڕێ كری د هنده‌ك هه‌لبژارتیان دا په‌یدابووینه، دیتنا من به‌رازیل به‌ربژارا بهێزه بۆ ناسناڤی سه‌رباری حه‌ز دكه‌م ئه‌رجه‌نتین ناسناڤی ببه‌ت.
بۆتان ده‌هام یاریزانێ یانا برایه‌تی گۆت: ئێك ژ سه‌ركه‌فتی و خوشترین مۆندیالانه هه‌تا نوكه دبینم و به‌رازیلێ شیانێن باش هه‌نه بۆ ده‌ستڤه ئینانا ناسناڤێ مۆندیالێ.
ئه‌حمه‌د شوكر ئه‌ندامێ ده‌سته‌یا كارگێریا یانا هه‌ولێر گۆت: مۆندیاله‌كا سه‌رنجراكێشه و ئاستێن گه‌له‌ك مه‌زن هاتینه دیتن و رێكخستنه‌كا سه‌ركه‌فتی یه، وه‌لاتێ قه‌ته‌ر شیایه روویه‌كێ جوان و شارستانی بۆ كه‌نداڤا عه‌ره‌بی و ئاسیا و وه‌لاتێن جیهانی بوو جیهانێ دیاربكه‌ت، بۆچوونا من به‌رازیل ژ هه‌ر هه‌لبژارتیه‌كێ دی نێزیكتره بۆ ناسناڤی.
رۆسته‌م ره‌سۆل سه‌رۆكێ ئێكه‌تیا تێنسا ئه‌ردی ل كوردستانێ گۆت: هه‌رچه‌نده گه‌ڕا دویێ دێ ب دووماهی هێت لێ هه‌ڤڕكیه‌كا بهێز دناڤبه‌را هه‌لبژارتیێن پشكدار په‌یدابوویه تایبه‌ت وه‌كو به‌رازیل، ئه‌رجه‌نتین، ئسپانیا و پێشبینیا من ئه‌رجه‌نتین دێ ناسناڤی به‌ت.
زێنه رۆسته‌م بێژه‌را وه‌رزشی و یاریزانا تێنسا ئه‌ردی هه‌مان بۆچوونا بابێ خوه رۆسته‌می دیاركریه لێ هه‌لبژارتیێ به‌رازیل به‌ربژاركریه بۆ ناسناڤی.
