وه‌رگرتنا قوتابيێن ده‌ره‌كى كه‌نگى دێ ده‌سپێكه‌ت؟
ئەڤرۆ نيوز:
بەرپرسێ پشکا ئەزموونان ل رێڤەبەریا پەروەردەیا دھۆک رۆژئاڤا دیار کر کو دەرگەھێ وەرگرتنا قوتابیێن دەرەکی ل پۆلا 5 بنەرەت ھەتا 11 ئامادەیی بۆ سالا خواندنێ 2016-2017 ھاتە ڤەکرن و پێشکێشکرن ھەتا 10/11/2016 دێ یا بەردەوام بیت.
خالد ئەحمەد خالد، بەرپرسێ پشکا ئەزموونان ل رێڤەبەریا پەروەردەیا دھۆک رۆژئاڤا بۆ رۆژناما ئەڤرۆ ئاشکرا کر کو ژ دایکبوویێن 1996 و بەر ب خوارێ مافێ ھەی پێشکێشی پۆلێن قۆناغا بنەرەت بکەن و ژ دایکبوویێن 1997 ھەتا 2000 ژی ھەکە دو سالان ل ئێک پۆل کەفت بن وان ژی مافێ خواندنێ ل قوتابخانەیێن رۆژ نامینیت و دشێن پێشکێشی دەرەکی بکەن، بەلێ سالا خواندنێ 2013-2014 ناھێتە ھژمارتن کەفتن، ھەروەسا ژ دایکبوویێن 2001 و پێھەل ھەکە دو سالان ل پۆلا خوە کەفت بن مافێ ھەی ھەر بمیننە ل خواندنا ب رۆژ.
ل دۆر وان قوتابیێن مافێ دەرەکی ل پۆلێن 10 و 11 ئامادەیی ھەی ناڤھاتی خویا کر کو ئەو کەس دشێن پێشکێشی ڤان ھەر دو پۆلێن ئامادەیی بکەن یێن مافێ خواندنێ ل قوتابخانێ نەمینیت ئەو ژی ژ دایکبوویێن 1992 کوڕ و 1991 کچ و بەر ب خوارێ، ھەروەسا قوتابیێن دو سالان ل پۆلا خوە دمینن یان دێ چنە قوتابخانەیێن ئێڤاران یان ژی دێ پێشکێشی دەرەکی کەن و گۆت: “ل دووڤ بڕیارا وەزارەتا پەروەردێ ئەڤ سالە پێشکێشکرن بۆ پۆلێن 10 و 11 پیشەیی نابیت”.
ناڤھاتی ئاماژە دا وێ چەندێ کو ھەر قوتابیەکێ پێشکێشی دەرەکی وەرزی دکەت، پێدڤیە شەش وێنان و کۆپیەکا ناسنامێ ل گەل خوە بینیت و دێ سەرەدانا پەروەردێ کەت و فۆرمەکێ وەرگریت و ل دووڤ دا دێ ل قوتابخانێ داگریت و پاشی دێ زڤڕینتە پەروەردێ و فایل دێ بۆ ھێتە ڤەکرن و وەک قوتابیەکێ دەرەکی دێ ھێتە وەرگرتن و گۆت: “پشتی قوتابی دھێنە وەرگرتن، قوتابیێن ل سالا بۆری ئەزموونێن دەرەکی کرین جارەکا دی ھەر دێ چنە وان قوتابخانان، چونکو تۆمار بۆ وان ل وان قوتابخانان یێن ھاتینە ڤەکرن و یێن دی ل دووڤ حەزا وان دێ ل سەر قوتابخانان ھێنە بەلاڤکرن”.
سەبارەت وەرگرتنا قوتابیێن دەرەکی بۆ پۆلا 12 ئامادەیی، بەرپرسێ پشکا ئەزموونان دیار کر کو پشتی 15/11/2016ێ دێ دەست ب وەرگرتنا قوتابیێن دەرەکی بۆ پۆلا 12 ئامادەیی ھێتە کرن.
