وه‌زاره‌تا ئه‌وقافێ نه د خزمه‌تا گه‌لێ كورد دایه
مخابن وه‌زاره‌تا ئه‌وقافا هه‌رێما كوردستانێ ب سه‌دان گه‌نج و خورتێن كوردان ب شێوه‌ك سیسته‌ماتیك و ب به‌رنامه‌ك دارێتی ل سه‌ر ئه‌قل و مه‌ژیه‌كێ سه‌له‌فیێن جیهادی و ته‌كفیر په‌روه‌رده دكه‌ن و به‌رێ وان دده‌نه رێێن تاریێ. بۆ میناك سه‌رێ سالا ٢٠١٥ ل گۆر ده‌زگه‌هێن راگه‌هاندنا حوكمه‌تا هه‌رێما كوردستانێ نێزیك سه‌د گه‌نجێن كوردان ژ كارمه‌ندێن وه‌زاره‌تا ئه‌وقافا هه‌رێما كوردستانێ گه‌هه‌شتنه ناڤ رێزێن تیرۆرستێن داعش جیهادێ ل دژی گه‌لێ كورد دكه‌ن. تشتێ سه‌رنجراكێش ئه‌وه كو هه‌یڤانه پارێ خوه ژ وه‌زاره‌تا ئه‌وقافێ وه‌ردگرن بێی رێڤه‌به‌رێن ئه‌وقافێ یان حوكمه‌تا هه‌رێما كوردستانێ پێزانینه‌ك ل سه‌ر بزاڤ و لڤینێن وان هه‌بن، یان سنۆره‌كی ژبۆ گۆتاربێژێن مزگه‌فتان دانن، كو به‌س خزمه‌تا وان هێزێن تاریێ بكه‌ن، یان ژی وه‌زاره‌تا ئه‌وقافێ ب زانابوون ئه‌و كه‌س هنارتنه ناڤ رێزێن تیرۆرستێن داعش. دیسا ڤان رۆژان تایبه‌ت رۆژا ٣٠ هه‌یڤا ئێك ٢٠١٥ ل گۆر ده‌نگوباسێن مه‌دیا كوردی ئه‌وقافا كوردستانێ پێشنیازكریه كو گۆرستانه‌ك تایبه‌ت ژبۆ كوشتیێن داعش ل كوردستانێ ئاڤا بكه‌ن، دا رۆژه‌ك بهێت خه‌لكێ مه‌یێ نه‌زان وان گۆرستانان بكه‌ن مه‌زارێن پیرۆز رۆژانه خێر و سه‌ده‌قان ل سه بده‌ن، كو ئه‌ڤه له‌شكرێ ئیسلامێ!! هه‌لبه‌ت ئه‌ڤه مه‌زنترین تاوانه وه‌زاره‌تا ئه‌وقافێ پێ رادبیت، پێدڤیه رێڤه‌به‌رێ ئه‌وقافا هه‌رێما كوردستانێ ئێكسه‌ر ده‌ست ژكارێ خوه به‌رده‌ن، ژبه‌ركو ئه‌ڤه مه‌ترسیه ل سه‌ر ئه‌من و ئاسایشا نه‌ته‌وه‌یی. لێ چما ئه‌وقافا هه‌رێما كوردستانێ پێشنیاز نه‌دكر كو گۆرستانه‌ك تایبه‌ت ژبۆ شه‌هیدێن كوردستانێ ئاڤا بكه‌ن كو رۆژانه ب ده‌هان یێ خوینا خوه‌یا پاك ل سه‌رخاكا كوردستانێ درژینن سه‌خمه‌راتی ئازادی و پاراستنا كوردستانێ كو ئه‌و گۆرستان ببته موزاخانه‌ك دیرۆكی ژبۆ نه‌ته‌وا كورد، كو ده‌ما خه‌لكێ جیهانێ قه‌ستا كوردستانێ دكه‌ن سه‌ره‌دانا وان بكه‌ن و شانازیێ ب خوین و خه‌باتا گه‌لێ كورد بكه‌ن، لێ ئه‌و حه‌ز و هه‌ستا نه‌ته‌وه‌یی ل نك وان نینه تنێ دینێ خوه دخزمه‌تا دوژمن و هێزێن داگیركه‌ردا بكاردئینن. دیسا حوكمه‌تا هه‌رێما كوردستانێ ژی به‌رپرسه ل هه‌مبه‌ر ڤان كار و ره‌فتارێن ترسناك. هه‌ر كه‌س دزانیت كو پڕانیا كارمه‌ند و رێڤه‌به‌رێن ئه‌وقافێ ئه‌ندام و لایه‌نگرێن حیزبێن ب ناڤ دیموكراسی، سوشیال دیمۆكراسی، لیبرالی و.. . ). نه ئه‌ندام و لایه‌نگرێن حیزب و لایه‌نێن ئیسلاما سیاسینه دا ب بهانه‌كێ خوه ژ ڤێ به‌رپرسیێ لابده‌ن. ! ل گۆر باوه‌ریا من پێدڤیه حوكمه‌تا هه‌رێما كوردستانێ ب بریاره‌ك فه‌رمی ل په‌رله‌مانێ كوردستانێ وه‌زاره‌تا ئه‌وقافێ بهه‌لوه‌شینیت باشتره ژ هه‌بوونا وێ، ژبه‌ركو چ خزمه‌تا گه‌لێ كورد ناكه‌ت ژ زیان و زه‌ره‌رێ پێڤه، ئه‌و پارێ ل وه‌زاره‌تا ئه‌وقافێ خه‌رج دكه‌ن بلا ل وه‌زاره‌تا ئه‌نفال و كۆچ و كۆچبه‌ران خه‌رجبكه‌ن. بلا كۆمه‌له‌كێ ب ناڤێ رێڤه‌به‌ریا كاروبارێن ئاینی بدامه‌زرینن ل جهێ وه‌زاره‌تا ئه‌وقافێ باشتره.
