وه‌زاره‌تا ده‌رڤه‌يا عيراقێ رۆهنكرنه‌كێ لدۆر راده‌ستكرنا تاوانباره‌كى ل هه‌رێمێ بۆ ئه‌لمانيا دده‌ت
ئه‌ڤرۆنيوز:
وه‌زاره‌تا ده‌رڤه‌يا عيراقێ، ئه‌ڤرۆ چارشه‌مبى 13/6/2018 راگه‌هاند، راده‌ستكرنا گومان لێكرى عه‌لى بشار بۆ ئه‌لمانيا سه‌رپێچيه‌كا قانوونى يه.
ئه‌حمه‌د مه‌حجوب، په‌يڤدارێ وه‌زاره‌تا ده‌رڤه‌يا عيراقێ دبه‌ياننامه‌كێ گۆت” راده‌ستكرنا گومان لێكرى عه‌لى بشار ژلايێ هه‌رێما كوردستانێ بۆ ئه‌لمانيا، سه‌رپێچيه‌كا قانوونى يه ژبه‌ر نه‌بوونا چو رێككه‌فتنێن هه‌ڤپشك دناڤبه‌را عيراقێ وئه‌لمانيا بۆ راده‌ستكرنا داخوازكه‌ريان”.
دياركر ژى” به‌غدا وێ چه‌ندێ ب سه‌رپێچى ل سه‌ر وى لايه‌نێ ئه‌و كه‌س راده‌ستكرى وئه‌و لايه‌نێ وه‌رگرتى ژى، ژبه‌ركو ئالوگوركرنا داخوازكاريان ده‌ستهه‌لاته‌كا سيادى يه وكارێ وه‌زاره‌تا داد يا فيدرالى يه”.
خوياكر ژى” عيراق ل گه‌ل وێ چه‌ندێ يه كو مافدار بگه‌هنه مافێن خوه وكه‌سێ تاوان كرى بهێته سزادان، به‌لێ ل دووڤ قانوونێ ودستوورى”.
عه‌لى بشار وه‌لاتيه‌كێ قه‌زا زاخۆيه ل سالا 2015 به‌ر ب ئه‌لمانيا چوويه، به‌رى ده‌مه‌كى ژلايێ پۆليسێن ئه‌لمانى هاتيه تۆمه‌تباركرن ب كوشتنا كچه‌كا 14 سالى يا ئه‌لمانى، به‌رى چه‌ند رۆژان ژلايێ پۆليسێن پارێزگه‌ها دهۆكێ ڤه هاتبوو ده‌سته‌سه‌ركرن ل زاخۆ وپاشى هاته راده‌ستكرن بۆ ئه‌لمانيا.
