وه‌زاره‌تا ساخله‌میێ: هه‌ژماره‌كا حاله‌تان د ژییێن جودا دا هاتینه ده‌ستنیشانكرن
ئه‌ڤرۆ:
وه‌زاره‌تا ساخله‌میا حوكمه‌تا هه‌رێما كوردستانێ د راگه‌هاندنه‌كێ دا دیار كر، هه‌ژمار و رێژا تووشبوونێ ب نه‌خۆشیێن زكچوونێ زێده‌بوویه و تیمێن په‌تازانیێ ل دووڤ ستانداردێن په‌تازانیێ رێژا پشكنینان بۆ دیتنا حاله‌تێن كولێرایێ ئه‌نجامداینه و هژماره‌كا حاله‌تێن ل ژییێن جودا دا ل هه‌ردو پارێزگه‌هێن هه‌ولێر و سلێمانیێ هاتینه ده‌ستنیشانكرن، دیسا رێڤه‌به‌ریا گشتی یا ساخله‌میا پارێزگه‌ها دهۆكێ ژی ل دۆر ئاماده‌كاریێن به‌رهنگاربوونا كۆلێرایێ كۆمبوونه‌ك ئه‌نجام دا.
د راگه‌هاندنا وه‌زاره‌تا ساخله‌میێ دا هاتیه: “دگه‌ل هاتنا وه‌رزێ گه‌رمێ و سروشتێ نه‌خۆشیێن زكچوونێ و پشتی چالاككرنا پرۆگرامێ په‌تازانیێ و دیتنا حاله‌تان بۆ گرتنه‌به‌را رێكێن پێدڤی بۆ كۆنترۆلكرنا نه‌خۆشیێن زكچوونا دژوار ژ لایێ ده‌زگه‌هێن ساخله‌میێ ل جهێن جوداجودا یێن هه‌رێما كوردستانێ، ل دووڤ پرۆگرام و پلانه‌كا دارێشتی بۆ به‌رچاڤكرنا وه‌لاتیان رادگه‌هینین، كو هه‌ژمار و رێژا تووشبوونێ ب نه‌خۆشیێن زكچوونێ زێده‌بوویه و تیمێن په‌تازانیێ ل دووڤ ستانداردێن په‌تازانیێ رێژا پشكنینان بۆ دیتنا حاله‌تێن كولێرایێ ئه‌نجامداینه و هه‌ژماره‌كا حاله‌تان ل ژییێن جودا ل هه‌ردو پارێزگه‌هێن هه‌ولێر و سلێمانیێ هاتینه ده‌ستنیشانكرن، بۆ ڤێ مه‌ره‌مێ وه‌زاره‌تا ساخله‌میا حكومه‌تا هه‌رێما كوردستانێ رێكارێن زێده‌تر و دژوارتر دگه‌ل لایه‌تێن چاندن و باژێرڤانیێ و ناڤخوه و پارێزگه‌ه و ئیداره‌یێن سه‌ربخوه و ساخله‌میێن پارێزگه‌هان و ئیداره‌یێن سه‌ربخوه ب هه‌ڤكاریا رێكخراوا ساخله‌میا جیهانی گرتینه به‌ر، د وارێ خوه‌پارێزی و چاره‌سه‌ریێ و دابینكرنا پێدڤیێن ساخله‌میێ”.
وه‌زاره‌تا ساخله‌میێ داخوازێ ژ وه‌لاتیان دكه‌ت پێگریێ ب رێنمایێن پاقژیا كه‌سایه‌تی و پشتراستبوون ژ ئاڤا ڤه‌خوارنێ و خوارنێ بكه‌ن و ل ده‌مێ ده‌ركه‌فتنا نیشانێن زكچوونێ ب زووترین ده‌م په‌یوه‌ندیێ ب ده‌زگه‌هێن ساخله‌میێ بكه‌ن ژ پێخه‌مه‌ت رێگریكرنێ ل ئالۆزیان و پاراستنا ساخله‌میا وه‌لاتیان.
دیسا هه‌ر ل دۆر بابه‌تی، رێڤه‌به‌رێ گشتیێ ساخله‌میا دهۆكێ، سه‌رپه‌ڕشتیا كۆمبوونه‌كێ دگه‌ل رێڤه‌به‌ریا كاروبارێن خوه‌پاراستنا ساخله‌میێ و رێڤه‌به‌رێن نه‌خۆشخانان، ل دۆر ئاماده‌كاریێن به‌رهنگاربوونا كۆلێرایێ كر.
د. ئه‌فراسیاب موسا گۆت: “هێشتا ئه‌م نه‌گه‌هشتینه قووناغا مه‌ترسیێ و پێدڤیه كار بكه‌ین بشێین كۆنترۆلا ره‌وشێ بكه‌ین و هه‌ڤكاریه‌كا باش دگه‌ل رێڤه‌به‌ریێن په‌یوه‌ندیدار د ڤی واری دا بكه‌ین، دیسا ل جهێن گشتی وه‌كو خوارنگه‌هان گرنگی ب پاقژیێ بهێته‌دان و هشیاریا وه‌لاتیان ل دۆر نه‌خۆشیێ بهێته كرن”.
د. ئه‌فراسیاب موسا، دیار كر ژی هه‌موو كه‌رسته و ده‌رمانێن پێدڤی ل ده‌زگه‌هێن ساخله‌میێ هاتینه دابینكرن، دیسا بڕیار هاته دان نه‌خۆشخانا لالاڤ بۆ پێشوازی و چاره‌سه‌ركرن ل حاله‌تێن دژوار بهێته ته‌رخانكرن.
