وه‌زاره‌تا شه‌هیدان: ئه‌و كه‌سێن ب نه‌یاسایی ب شه‌هید هاتینه تۆماركرن نامینن
ئه‌ڤرۆ:
حوكمه‌تا هه‌رێما كوردستانێ ل چاكسازیكرن د لیستا شه‌هیدان و زیندانیێن سیاسی دا یا به‌رده‌وامه و رێڤه‌به‌رێ گشتی یێ شه‌هید و ئه‌نفالكریان ل هه‌ولێرێ ژی دبێژیت: ژ ئه‌گه‌رێ چاكسازیێ ئه‌و كه‌سێن ب نه‌یاسایی ب شه‌هید هاتینه تۆماركرن، هه‌موو دێ هێنه ژێبرن.
داماو محه‌مه‌د، رێڤه‌به‌رێ گشتی یێ شه‌هید و ئه‌نفالكریان ل هه‌ولێرێ خویا كر، به‌رده‌وام چاكسازی د لیستا شه‌هیدان و زیندانیێن سیاسی دا دهێته‌كرن و بۆ مالپه‌رێ فه‌رمیێ پارتی دیموكراتی كوردستان گۆت: “پلانا حوكمه‌تا هه‌رێما كوردستانێ ئه‌وه، چو كه‌سه‌ك ژ ده‌رڤه‌ی یاسایێ د ناڤ لیستا شه‌هیدان دا نه‌مینیت، هه‌كه به‌ری نوكه كه‌سه‌ك ب هه‌ر ئه‌گه‌ره‌كێ هه‌بیت، بناڤێ شه‌هید هاتبیته تۆماركرن، پشتی پێداچوونێ ناڤێ وی دێ هێته ژێبرن و به‌رده‌وام پێداچوونا ب لیستا شه‌هیدان دا دهێته‌كرن”.
ئاشكرا ژی كر، پشتی ده‌ركه‌فتنا یاسایا چاكسازیێ، به‌رده‌وام كار بۆ پێداچوونا باده‌كا هه‌موو شه‌هید و زیندانیێن سیاسی دهێته كرن.
ل دۆر ڤه‌گوهاستنا باده‌كا شه‌هیدێن شه‌رێ داعش بۆ سه‌ر وه‌زاره‌تا شه‌هیدان، ناڤهاتی گۆت: “پێشنیاز بۆ چاره‌سه‌ركرنا پرسا شه‌هیدێن شه‌رێ داعش هاتینه كرن، چونكو هه‌تا نوكه مووچێ وان ل وه‌زاره‌تا پێشمه‌رگه‌یه”.
