وه‌زاره‌تا كاروبارێن جڤاكی: گوژمه‌كێ پاره‌ی ب خێزانێن كێمده‌رامه‌ت دێ هێته‌دان
ئه‌ڤرۆ:
وه‌زاره‌تا كار و كاروبارێن جڤاكی یا حوكمه‌تا هه‌رێما كوردستانێ ب هه‌ماهه‌نگی ل گه‌ل بانكا نێڤده‌وله‌تی، هاریكاریا هه‌ژماره‌كا خێزانێن كێمده‌رامه‌ت ل دهۆكێ دێ كه‌ت و بریكارا وه‌زاره‌تێ ژی دبێژیت: ئه‌و هاریكاریه گوژمه‌كێ پاره‌یه بۆ هاریكاریكرنا خه‌لكێ كێمده‌رامه‌ت.
زه‌كیا سه‌ید سالح، بریكارا وه‌زاره‌تا كار و كاروبارێن جڤاكی بۆ مالپه‌ڕێ فه‌رمیێ پارتی دیموكراتی كوردستانی راگه‌یاند، ئه‌ڤ پڕۆژه وه‌كو تێست ل پارێزگه‌ها دهۆكێ دێ هێته بجهئینان و هه‌تا نوكه سێ هه‌زار و 200 خێزان هاتینه تۆماركرن، وه‌زاره‌ت ل گه‌ل بانكا نێڤده‌وله‌تی ڤێ پڕۆسێ دێ برێڤه به‌ت و پاره‌یه‌كێ هه‌یڤانه، كو هه‌تا نوكه نه‌هاتیه دیاركرن، ل سه‌ر وان خێڤزان دێ هێته به‌لاڤكرن.
بریكارا وه‌زاره‌تا كار و كاروبارێن جڤاكی گۆت: “ئه‌و هاریكاریه ژ لایێ حوكمه‌تا هوله‌نداڤه هاتیه دابینكرن بۆ پشته‌ڤانیا خێزانێن هه‌ژار، ئه‌وێن چو داهات نه‌یی، ئه‌ڤه ژی پێنگاڤه‌كا باشه بۆ خێزانێن كێمده‌رامه‌ت”.
زه‌كیا سه‌ید سالح ئاماژه‌ی ب وێ چه‌ندێ ژی كر كو حكومه‌تا هه‌رێما كوردستانێ د بزاڤان دایه بۆ ڤه‌گه‌ڕاندنا پێشینا خێزانێن بێ سه‌رپه‌رشت و كێمده‌رامه‌ت، لێ هێشتا پرۆسه د قووناغا ڤه‌كۆلینێ دایه و پشتی تمام دبیت، بڕیار ل سه‌ر به‌لاڤكرنا وێ دێ هێته‌دان.
