وه‌زاره‌تا كافران
وه‌زاره‌تا ده‌رڤه یا داعشێ خودێ هاریكارێ وێ بیت، چه‌ند بزاڤ و تێكۆشینان دخوازیت حه‌تا هه‌مى كار و پۆسته‌یێن خوه یێن نێڤده‌ولى ئه‌نجام بده‌ت، گه‌له‌ك ماندى دبیت، هند ژه‌هرا زلهێزان خرڤه دكه‌ته د به‌نكه‌كا مالوێران دا و دبه‌رده‌ته هه‌ژاران!!، هه‌ر وه‌كو چه‌ته‌یا وه‌خته‌كى بوو ل عیراقێ و رێخستنا هه‌مى عه‌شیره‌ت و جاشاتیێ، ئه‌ڤه ئێكه ژ وه‌زاره‌تێن سه‌ر ب ئه‌وا دبێژیته خوه (خیلافه‌تا ده‌وله‌تا ئیسلامى ل عیراقێ و شامێ) ڤه، ناڤێ وێ كرینه (وزاره المراسلات مع الكفره)، دیاره كارێ ڤێ وه‌زاره‌تێ پترى هه‌میان كارێ خوه دكه‌ت و هه‌مى ژى ب ئه‌نجامێن وه‌به‌رهێنه‌رن، به‌لێ هه‌مى ژى ل پشت په‌ردان، چونكو ل دووڤ رێكا فه‌رمى و دیپلۆماسی دڤێت وه‌زاره‌تێن ده‌ره‌ڤه سه‌رده‌ریێ ل گه‌ل هه‌ڤ بكه‌ن، باشه ئه‌وان وه‌لاتێن دیتر یێن (كافر) بلا بن، ئه‌و ب چو ئه‌جینده سه‌رده‌ریێ ل گه‌ل داعشێ دكه‌ن؟ ئه‌و ژى ب وه‌زاره‌تا ده‌رڤه یان ژى ب ئه‌جینده‌یێن هه‌والگێرى؟، دۆسیێن تایبه‌ت هه‌نه ب نهێنى كارێ خوه دكه‌ن، پشتا ئێكدو دگرن مافیانه، داعشێ ژى بۆ خوه ئه‌ڤ سه‌ره‌ده‌ریه حه‌لال كریه و ل پشترا ژى یا كافرتر ژ هه‌میان ئه‌وه، ل دووڤ ئه‌و ئایه‌تا بۆ موسلمانان ره‌وا دكه‌ت كو سه‌رده‌ری ل گه‌ل كافران بكه‌ن (بالبر و القسگ) قال الله تعالى:((لا ێنْهَاكُمُ اللَّهُ عَنِ الَّژِینَ ڵمْ یُقَاتِلُوكُمْ فِی الدِّینِ ۆڵمْ یُخْڕجُوكُمْ مِنْ دِێاڕكُمْ أَنْ تَبَرُّوهُمْ ۆتُقْسِگُوا إِڵیْهِمْ إِنَّ اللَّهَ یُحِبُّ الْمُقْسِگِینَ)) الممتحنه:8}.
كار و كریارێن داعشا نازدار ل به‌ر وه‌لاتێن زلهێز گه‌له‌ك د ڤێ وه‌زاره‌تێ دا دگرێداینه، چونكو یا ساڤایه و ژ گوهانێن زلهێزان ڤه‌دخۆت، هه‌كه نه دێ ل سه‌ر ده‌ستێ پێشمه‌رگه‌ى مریت، هه‌مى ئه‌میر و به‌رپرسێن پله‌یێن هه‌ستیار د ده‌ست دا ژ ده‌رڤه‌ى خیلافه‌تا داعشێ نه، وه‌لاتیێن وێ ژ هه‌مى پارچێن جیهانێ نه، جهێ حێبه‌تیێ یه، ئه‌ڤ رێكخراوا مه‌ترسیدار و هندا مه‌زن و ب ناڤێ ئیسلامێ، ئه‌و چو ئالاڤ و میكانزمه، پلانا وێ كێ دانایه، هۆسا هه‌مى ده‌وله‌ت ب خشكۆكی به‌هرا خوه خستینه تێدا، ما چو كارێن دیتر نینن، ژ بلى هندێ هاتین ب لێڤا مه‌ڤه ماین؟! ئه‌ڤجا ئه‌ڤ وه‌زاره‌ته پترى هه‌میان گرێداى وه‌زاره‌تێن دی یه، هه‌كه په‌یوه‌ندیا وێ ل گه‌ل وه‌زاره‌تا به‌رگریێ بیت ئه‌وا كریه ـ وه‌زاره‌تا جیهادێ دێ دیار بیت، بۆ نموونه كا چاوا شاره‌زایا له‌شكرى یا گه‌له‌ك وه‌لاتان ته‌ڤلى هه‌ڤ بوویه، ل مووسل ژ بلى تشتێن سه‌ناهى و پیاده كو پتریا سه‌ربازان ژ عیراقێ نه، شاره‌زایى یا كریارێن سه‌رڤه سه‌رڤه یا دیاره شوون تبلێن ئه‌فسه‌رێن كه‌ڤنێن عیراقێ نه، به‌لێ هنده‌ك تشتێن مه‌زنتر ژ كیڤه هاتینه، وه‌كو كۆلانا تونێلان ب وان ئامیرێن سه‌یر، بۆ نموونه توركیا ژ وه‌لاتێن ئێكێ یه بۆ شاره‌زایا كۆلانا تۆنێلان و ئامیرێن كۆلانێ، یا نێزیكه ژى ئه‌ڤ ئامیره پێدڤى راڤه‌كرنه‌كا تێر و ته‌سه‌له. هه‌ر دیسا كارێن سیخوریێ و جاسوسان ژى چه‌ند گرێدانه‌كا خۆرت هه‌یه، دووماهى تشت ئه‌وا به‌رى دو رۆژان ئه‌و كابرایێ ل سه‌ر ده‌ستێن پێشمه‌رگه‌ى شه‌رمزار بووى ژ وه‌لاتێ یابانێ و ل عیراقێ و كارێ خوه ب ئاشكرایى دكه‌ت، په‌یوه‌ندى هه‌بوو و مۆبایلا وى هاته دیاركرن ل گه‌ل داعشان.
دكارین بێژین داعش نڤیسنگه‌هه‌كا هه‌ڤپشكا چه‌ندین ده‌وله‌تانه دوور نینه هه‌مى باده‌كێن وێ ل وه‌زاره‌ته‌كا ب ڤى ره‌نگى بن، هه‌مى تشت بۆ خوه حه‌لال و ره‌وا كریه، هه‌كه باخڤن ژى دێ ئایه‌ته‌كێ بۆ خوه كه‌نه كه‌س و بهانه، هه‌ر وه‌كو وه‌زاره‌تا گه‌شتوگوزار ژى ناڤێ وێ كریه وه‌زاره‌تا (النكح)، وه‌زاره‌تا راگه‌هاندێ كریه (وزاره قژف المحصنات)، یا په‌یوه‌ندیكرنێ و ئه‌نترنێتى كریه (وزاره الوسواس الخناس) و ئه‌و ب خوه ژى هه‌مى كارى ل سه‌ر دكه‌ن، یا ل پشتى وه‌زاره‌تا ده‌رڤه ژى وه‌زارتا پلاندانانێ یه كو دبێژنێ (وه‌زاره‌ت الاستخاره)، وزاره‌تا ڤه‌گوهاستنێ ژى ناڤه‌كێ پاشكه‌فتى دانایه سه‌ر كرینه (وه‌زاره الجمال و البغال و سائر المركوبات)، و پرانیا ئه‌میرێن وان وه‌كو دیار ترانزێت هه‌نه و ژ مه بسته‌ترن بۆ هاتنوچوونان ل ڤى وه‌لاتى و یێ دیتر، كه‌سێ نه‌زان نه‌مایه و هه‌مى تشت دپێش چاڤن، كیانه‌كێ مه‌زن و شاره‌زایه‌كا مه‌زن ل پشترایه، به‌لێ ما ده‌م ل سه‌ر بنیاته‌كێ نه دادوه‌ر هاتیه دانان ل به‌رامبه‌ر ژ بلى به‌رژه‌وه‌ندیێن وان یێن لابه‌به‌لا به‌لێ ل به‌رامبه‌ر دۆزه‌كا ره‌وا یا ملله‌ته‌كێ هه‌ژار پێ نه‌ڤێت پێشمه‌رگێن وێ دێ ئه‌وێ ژبن به‌ن بلا هزار ده‌وله‌ت ل پشتا وێ بن.
