وه‌زیرێ باژێرڤانیان: رێڤه‌به‌ریێن گشتیێن نه‌خشه‌دانان و باژێرڤانیان ل زاخۆ دێ هێنه ڤه‌كرن
زاخۆ، عه‌لی حاجی:
ساسان عه‌ونی، وه‌زیرێ باژێرڤانیان و گه‌شت و گوزارێ ل حوكمه‌تا هه‌رێما كوردستانێ دوهی 24/10/2021 سه‌ره‌دانا ئیداره‌یا سه‌ربخوه یا زاخۆ كر و ژلایێ گوهدار شێخۆ، سه‌رپه‌رشتێ ئیدارا سه‌ربخوه یا زاخۆ ڤه پێشوازی لێ هاته كرن.
وه‌زیرێ باژێرڤانیان و گه‌شت و گوزارێ ل حوكمه‌تا هه‌رێمێ د كۆنگره‌كێ رۆژنامه‌ڤانی دا گۆت: “ئه‌م وان كێشه‌یێن ماددیێن هه‌لاویستی یێن باژێرڤانی و گه‌شت و گوزار و شوونواران ل زاخۆ بۆ جڤاتا وه‌زیران دێ بلند كه‌ین، داكو بهێنه چاره‌سه‌ركرن، ژ به‌ركو زاخۆ د ڤان بیاڤان دا گرنگیه‌كا زۆرا هه‌ی، دیاره كێشه‌یا رانه‌كرنا به‌رمایكان ل زاخۆ بوویه كێشه‌یه‌كا گشتی، ژ به‌ر وێ چه‌ندێ دێ د ده‌مه‌كێ نێزیك دا ئه‌و كێشه‌یه هێته چاره‌سه‌ركرن، بۆ ڤێ چه‌ندێ ژی هنده‌ك پێنگاڤێن باش هاتینه هاڤێژتن، ب رێیا ئیداره‌یا سه‌ربخوه یا زاخۆ دێ پلانێن باش بۆ رێكخستن و ماسته‌رپلانا زاخۆ دانین و ئه‌و كێشه‌یێن ل زاخۆ ژی هه‌ین، دخوازین ئیداره‌یا سه‌ربخوه یا زاخۆ چاره‌سه‌ر بكه‌ت”.
گۆتژی: “ب سه‌ربخوه‌بوونا ئیداره‌یا زاخۆ ب پێنگاڤه‌كا باش دبینن و ئه‌م دخوازین كو زێده‌تر خزمه‌ت بۆ ڤێ ده‌ڤه‌رێ بهێته كرن، ئه‌م وه‌كو وه‌زاره‌تا باژێرڤانیان و گه‌شت و گوزارێ ژی دێ پشته‌ڤان بین بۆ پێنگاڤێن ئیداره‌یا ناڤهاتی”.
ناڤهاتی زێده‌تر گۆت: “بڕیار هاتیه‌دان رێڤه‌به‌ریا گشتی یا باژێرڤانیان و رێڤه‌به‌ریا گشتی یا نه‌خشه‌دانانێ ل زاخۆ بهێنه ڤه‌كرن و ئه‌ڤ بڕیاره دێ د ده‌مه‌كێ نێزیك ژی دا كه‌ڤیته د بیاڤێ بجهئینانێ دا، ئه‌و كێشه‌یێن هه‌ین ژی ب تایبه‌تی د بیاڤێ جادده و گه‌شت و گوزارێ و شوونواران دا دێ هێنه چاره‌سه‌ركرن، دیسا پشتی ڤه‌كرنا رێڤه‌به‌ریا گشتی یا نه‌خشه‌دانانێ گه‌له‌ك كێشه‌یێن ئیدارا سه‌ربخوه یا زاخۆ دێ هێنه چاره‌سه‌ركرن، ب تایبه‌تی ژی د بیاڤێ رێكخستنا گه‌شت و گوزارێ و خزمه‌تگوزاریان دا”.
