وه‌زیرێ په‌روه‌ردێ: پارێزگه‌ها دهۆكێ گیانێ وه‌رزشا په‌روه‌ردێ ڤه‌گه‌ڕاند
ئه‌ڤرۆ،
د داخویانیه‌كێدا د. ئالان حه‌مه سه‌عید وه‌زیرێ په‌روه‌ردێ ل حوكمه‌تا هه‌رێما كوردستانێ ده‌ستخووشا هه‌موو لایه‌نێن په‌یوه‌ندیدار ب رێكخستنا قاره‌مانیێن باسكت بۆل، فۆتسال و ته‌پا مێزێ سه‌ر ئاستێ په‌روه‌ردێن هه‌رێما كوردستانێ كر تایبه‌ت رێڤه‌به‌ریا گشتی یا په‌روه‌ردا دهۆكێ و پشكا چالاكیێن وه‌رزشی و دیده‌ڤانی و شیان گیانێ وه‌رزشا په‌روه‌ردێ بۆ قوتابیان ڤه‌گه‌ڕێنن.
زێده‌تر وه‌زیرێ په‌روه‌ردێ بۆ ده‌زگه‌هێن راگه‌هاندنێ گۆت: ئه‌ڤه بۆ ماوه‌كێ درێژه ژبه‌ر ڤایرۆسێ كۆرۆنایێ چالاكیێن وه‌رزشی و هونه‌ری هاتبوونه راوه‌ستاندن لێ ئه‌ڤ چالاكیێن بۆ ماوێ زێده‌تری حه‌فتیه‌كه ل دهۆكێ هاتینه ئه‌نجامدان رامانا وێ وه‌زاره‌تا په‌روه‌رده‌ێ و پشته‌ڤانیا حوكمه‌تا هه‌رێمێ و سه‌رۆكێ حوكمه‌تێ رێزدار مه‌سرۆر بارزانی به‌رده‌وامه لسه‌ر پشته‌ڤانیێ و قۆتابی ژی گه‌شبینكرینه بۆ به‌رده‌وامیا وه‌رزشێ و مه به‌رنامێن باش هه‌نه ژبۆ پێشخستنا وه‌رزشا په‌روه‌ردێن هه‌رێما كوردستانێ.
ژلایه‌كێ دووڤه د.ئالان حه‌مه سه‌عید دیاركر وه‌زاره‌تا په‌روه‌ردێ رێبه‌ره‌كێ تایبه‌ت بۆ مامۆستایێن وه‌رزشێ به‌رهه‌ڤكرینه و گۆت: بۆ سالا خواندنێ 2022 – 2023 رێبه‌ره‌كێ تایبه‌ت یێ وانێن وه‌رزشێ هاتیه به‌رهه‌ڤكرن بۆ پۆلا ئێكێ هه‌تا پۆلا شه‌شێ بنه‌ره‌ت دیسان بۆ پۆلێن حه‌فت، هه‌شت و نه‌ه رێبه‌ره‌كێ تایبه‌ت دانایه و ل دووڤ پرۆژه‌یی پاشه‌رۆژه‌كا نێزیك دێ مه قوتابخانێن تایبه‌ت یێن وه‌رزشێ هه‌بن كو ئه‌و ده‌یك و بابێن حه‌ز هه‌بیت زاروویێن خوه لڤێ قۆنابخانێ بخووین دێ ده‌رگه‌ه بۆ هێته ڤه‌كرن كو ئه‌ڤ قۆتابخانه بێ به‌هر نابیت ژ وانێن زانستێ و هه‌مان شێوه دێ قوتابخانێن تایبه‌ت ب وارێ هونه‌ری دا هه‌بیت لێ ئه‌ڤه وێ چه‌ندێ ناگه‌هینت كو بابه‌تێن زانستی نابن به‌لكو دێ ل گه‌ل دابن و گرنگی ژی بوو هێته دان ئه‌ڤچه‌نده‌ژی پێخه‌مه‌ت ئه‌و قوتابیێ حه‌زا وه‌رزشێ هه‌بیت و دووماهیێ ل كۆلیژێ یان په‌یمانگه‌ها وه‌رزشی درێژی ب خواندنا خوه بده‌ت دێ ده‌لیڤه باشتر بیت و دێ بۆ كه‌سایه‌تیه‌كێ وه‌رزشی دروست كه‌ت هه‌مان شێوه قوتابخانێن هونه‌ری ژی بیت و نه‌بتنێ وانه‌یێن تیۆری بهێنه گۆتن به‌لكو پراكتیكی ژی بو مه گرنگه.
بۆ زانین دوهی قاره‌مانیا ته‌پا مێزێ ل سه‌ر ئاستێ په‌روه‌ردێن هه‌رێما كوردستانێ بۆ كوڕان و كچان ل هۆلا گرتیا یانا دهۆك هاتبوو ئه‌نجامدان، په‌روه‌ردا سلێمانیێ ناسناڤێ قاره‌مانیێ ل سه‌ر كیستێ په‌روه‌ردا دهۆكێ ب ده‌ستڤه ئینا.
