وهزیرێ بهرهڤانیا عیراقێ بهرامبهر دو شهڕێن چارهنڤیس
وهزیرێ بهرهڤانیا عیراقێ، وهك كهسهكێ تازه دیار بووى د گۆڕهپانا لهشكریا عیراقێ دا و پێشبینى تێته كرن كو ل ئایندهى رۆل د ململانا سیاسیا پێكهاتێ سوونا دا ههبیت، د دهمهكی دا كو ههموو هزر و شارهزایا خوه یا لهشكرى یێن تهرخان كرین بۆ برێڤهبرنا شهڕهكێ گهرم ل گهل تیرۆرستێن داعش، ب خافلهتی ڤه خوه دیت كو ئهو ئارمانجا شهڕهكێ ساره ل ئهنجومهنێ نوونهرێن عیراقێ. ههر دو شهڕ د گرنگن، یێ ئێكێ گرێدایى جارهنڤیسێ عیراقێ یه و یێ دویێ ب مان و نهمانا كهسایهتیا وى یا سیاسى و لهشكرى ڤه گرێدایه. د شهڕێ گهرم دا، ههبوونا وى یا دیاره د بهروكێن شهڕیدا و یێ شیاى دربێن مهزن ل تیرۆرستان بدهت چ ل بهرهى رۆژئاڤایێ عیراقێ د سنوورێن پارێزگهها ئهنبار دا یان ژى ل بهرهیێ ناڤهند كو هێزێن لهشكرى یێن لڤاندین بۆ شهڕێ ئازادكرنا پارێزگهها نهینهوا. لێ ژ لایێ دی ڤه هۆولا ئهنجومهنێ نوونهرێن عیراقێ یێ بوویه گۆڕهپانا شهڕهكێ دى دژى وهزیرێ بهرهڤانیێ ب سهركێشی یا دو پهرلهمانتارێن ژن یێن سهر ب لایهنێن شیعان ڤه كو ئهو شیان د ماوێ دهه ههیڤان دا دو جاران وى ب راكێشنه ئهنجومهنێ نوونهران و لێپرسینێ لێ بكهن ل سهر بادهكێن گهندهلیێ. د لێپرسینا ئێكێ دا ب سهرساخى ژێ دهرباز بوو، لێ د دووماهیك لێپرسین دا ئهوا ل ئێكى تهباخێ هاتیه ئهنجامدان وهزیرێ بهرهڤانیێ پێگێرى ب رێسا و قانوونێن شهڕى نهكر كو دڤیا ب تنێ بهرهڤانیكهر بیت دهمێ ب هێرشێ دهست پێ كرى. هێرشا وى بوو ئهگهرێ ئاشكراكرن و تۆمهتباركرنا دهست تێوهردانا سهرۆكێ ئهنجومهنێ نوونهران و هندهك ژ ئهندامێن ئهنجومهنى د كاروبارێن وهزارهتا بهرهڤانیێ دا و پاشى رهوانهكرنا بادهكا بۆ دادگههێ و كارڤهدانێن جودا ل دووڤ هاتن ل سهر ئاستێ سیاسى و جهماوهرى سهرانسهرى عیراقێ.
سهروكێ ئهنجومهنێ نوونهران، ئهوێ سۆز داى كو سهركێشیێ نهكهت تاكو دوپاتیا دهست پاكیا خوه بكهت، ئاماده بووى ل دادگههێ و بێ گونهه زڤرى ڤه و دوباره دهست ب كارێ خوه كر وهك سهرۆك. وى وهك كارهكێ پیشهیى سهرهدهرى ل گهل لێپرسینا وهزیرى كر و ئێخسته بهر دهنگدانێ و ب پڕانیا دهنگان ئهندامێن ئهنجومهنێ نوونهران باوهرى ب بهرسڤێن وهزیرى نهبوو و دبیت ئهڤ بێ باوهریه ببیته رێكا لادانا وى. ل ڤێره یا فهره بارودوخێ روونشتنا ئهنجومهنێ نوونهران و مهرهمێن ل پشت لێپرسینێ بێنه بهرچاڤرن: كهش و ههوایێ روونشتنا ئهنجومهنێ نوونهران یێ ئالۆز و نهل بار بوو. ئهندامێن ئهنجومهنى ئهو پهرێ نهپێگێریێ نیشا دا و پڕانیا وان هۆلا لێپرسینێ كربوو هۆلا هاتنوچوونێ و دانوستاندنێن لابهلا ئهڤجا ههر ههلسهنگاندنهكا بهرسڤێن وهزیرى د وێ گێلهشویا د هۆلێ دا رووداى د دهمێ لێپرسینێ دا یا زانستى و دادپهروهر نابیت. ههر وهسا دیار بوو ل دووڤ گۆتنێن وهزیرى كو ناكۆكیهك ههبوو د ناڤبهرا وى و پهرلهمانتارا لێپرسین ل گهل دا دكر. روونشتن ژ رێكا خوه یا راست، كو لێپرسین بوو، لادا و بۆ روونشتنا تۆمهت بهخشینێ.
هزرا من سێ مهبهستێن نهینى یێن ل پشت لێپرسینێ ههین ئهو ژى: مهرهما ئێكێ، لایهنێن شیعا دڤێت ب رێكا ئێخستنا فشارێ ل سهر وهزیرێ بهرهڤانیێ نهچار بكهن كو نهبیته رێگر د پشكداریا گرۆپێن چهكدارێن حهشد ئهلشهعبى د ئازادكرنا باژێرێن سوونا دا. دو، دیاره ناكۆیێن دژوار یێن د ههین د ناڤبهرا هێز و لایهنێن سیاسیێن سوونا دا بۆ وهرگرتنا دهستههلاتێ ئهگهر هات و ههرێمهكا فێدرال بۆ سوونا هاته دامهزراندن پشتى شهڕ ب دووماهى تێت و ئهڤ لێپرسینه رێكهكه بۆ ئێكلاكرنهكا پێشوهخت یا وان ههڤڕكیان. سێ، هزرا لهشكرى یا زاله د كار و كارڤهدانێن وهزیرێ بهرهڤانیێ دا ل گهل پرانیا هێز و لایهنێن پشكدار د پرۆسا رێڤهبرنا عیراقێ دا ئهو ژى دزڤریت بۆ كێم ئهزموونی یا وى د وارێ پهیوهندیان دا كو گههشته رادهكێ دۆست و ههڤڕكێن وى دژى وى ب راوهستن. وهزیرێ بهرهڤانیێ دزانیت كو ئهو یێ ل بهر ههرهشێ ژ بهر هندێ یێ كار دكهت بۆ ب دهستڤهئینانا پشتهڤانیهكا جهماوهى، ههروهسا د ناڤ رێزێن لهشكرێ عیراقێ دا. ئهو شیا خوه بكهته كهسهكێ جهماوهریێ بێ لایهن و ئهڤه یا دیار بوو د سهرهدانێن وى دا بۆ (كازمیێ و ئهعزهمیێ) و پاشى بۆ كهمپا راهینانا لهشكریا (بسمایه).
ب هزرا من ڤهدهر ژ ڤان كیش و بێشان، وهزیرێ بهرهڤانیێ یێ تێته بهرههڤكرن ژ لایێ هێزێن دهرهكی ڤه كو ببیته كهسهكێ كاریگهر د ههر گهۆرینهكا ل عیراقێ بێته كرن ژ بهر بالیۆزخانێن وهلاتێن پهیوهندیدار برێڤهبرنا عیراقێ ڤه د دوور نینن ژ ڤان روودانێن سیاسى. وهزیرێ بهرهڤانیێ ئهگهر هات و بێته لادان ژى، یێ سهركهفتى بوو د ڤێ لێپرسینێ دا ژ بهر ئهنجام وهسا هاته نیشادان كو كهسهكێ دهست پاك و راستگۆیه.
