وه‌زیرێ كاره‌بێ ل گه‌ل ستافێ كۆمپانیێن بجهئینه‌رێن پڕۆژه‌یێ هایدروپاوه‌رێ دێره‌لۆكێ كۆمبوو
ئامێدیێ، مه‌حمود نهێلی:
ئه‌ندازیار كه‌مال محه‌مه‌د سالح، وه‌زیرێ كاره‌بێ یێ حكومه‌تا هه‌رێما كوردستانێ و شانده‌كێ د گه‌ل دا سه‌ره‌دانا ده‌ڤه‌رداریا ئامێدیێ و پڕۆژه‌یێ هایدروپاوه‌رێ دێره‌لۆكێ دا و ل گه‌ل ستافێ كارگێری و هونه‌ری یێ كۆمپانیێن بجهئینه‌رێن پرۆژه‌ی كۆمبوو.
وارشین سه‌لمان، ده‌ڤه‌ردارێ ئامێدیێ بۆ رۆژناما ئه‌ڤرۆ دیار كر، مه‌ره‌م ژ سه‌ره‌دانا وه‌زیرێ كاره‌بێ بۆ ده‌ڤه‌رێ ژ نێزیك هایداربوونه ل سه‌ر ره‌وشا كاره‌با ده‌ڤه‌رێ و دیتنا رێیێن زێده‌كرنا به‌رهه‌مئینانا كاره‌بێ ب رێكێن سروشتی و چاوانیا ب رێڤه‌چوونا كارێ پرۆژێ هایدروپاوه‌رێ دێره‌لۆكێ و گۆت: “وه‌زیرێ كاره‌بێ به‌حس ل چاوانیا چاره‌سه‌ركرنا ئاریشێن كاره‌بێ ل سنوورێ ده‌ڤه‌رداریا ئامێدیێ كر، دیسا وه‌زاره‌ت د بزاڤێن به‌رده‌وام دایه بۆ زێده‌كرنا ژێده‌رێن جودا جودا یێن به‌رهه‌مئینانا كاره‌بێ ل سنوورێ پارێزگه‌ها دهوكێ”.
ده‌ڤه‌ردارێ ئامێدیێ گۆتژی: “وه‌زیرێ كاره‌بێ و شاندێ د گه‌ل دا ل گه‌ل ستافێ كۆمپانیێن بجهئینه‌رێن پرۆژێ هایدروپاوه‌رێ دیره‌لۆكێ ته‌كه‌زی ل سه‌ر نه‌هێلانا ئاریشه و ئاسته‌نگێن د كه‌ڤنه د رێكا كارێ وان دا كرن، نوكه پرۆژه د قووناغێن دووماهیێ دایه و بڕیاره ل ڤان نێزیكا بكه‌ڤیته د خزمه‌تا وه‌لاتیان دا”.
