وه‌زیرێ په‌روه‌ردێ باسێ پلان و به‌رنامێن وه‌زاره‌تێ بۆ ئه‌ڤ ساله دكه‌ت
ئه‌ڤرۆ:
ئالان حه‌مه سه‌عید، وه‌زیرێ په‌روه‌ردێ ل حوكمه‌تا هه‌رێما كوردستانێ دوهی 30/1/2022 د كۆنفرانسه‌كێ رۆژنامه‌ڤانی دا، باسێ پلان و به‌رنامه‌یێن وه‌زاره‌تێ بۆ خواندنا ئه‌ڤ ساله و ئاسته‌نگێن دكه‌ڤنه به‌رامبه‌ری ڤه‌كرنا ده‌رگه‌هێن ناڤه‌ندێن خواندنێ كر.
وه‌زیرێ په‌روه‌ردێ د وی كۆنفرانسێ رۆژنامه‌ڤانی دا ل دۆر كارتێكرنا كۆرۆنایێ گۆت: “ئاریشا كۆرۆنایێ هه‌ر یا هه‌ی، له‌و مه ژی بڕیار دا ئه‌ڤرۆ 31/1/2022 بڤه‌گه‌ڕینه‌ڤه ناڤه‌ندێن خواندنێ، ڤه‌گه‌ڕاندنا مه ژی بۆ ناڤه‌ندێن خواندنێ دێ ل سه‌ر بنه‌مایێ بجهئینانا رێنمایێن خوه‌پارێزیێ بیت”.
ئالان حه‌مه سه‌عید ئاماژه ب وێ چه‌ندێ ژی كر كو وه‌رزێ ئێكێ یێ خواندنێ ب سه‌ركه‌فتیانه ب دووماهی هات و گۆت: “ل رۆژا 25/1/2022 جڤاتا وه‌زاره‌تا په‌روه‌ردێ كۆمبوو، تێدا سالناما خواندنێ بۆ وه‌رزێ دویێ راستڤه كر و چێدبیت د ڤان دو رۆژێن بهێن دا سالناما راستڤه‌كری ژی بهێته راگه‌هاندن”.
ده‌رباره‌یی پرۆسه‌یا دانانا ڤاكسینێ ژی ژلایێ مامۆستایانڤه، وه‌زیرێ په‌روه‌ردێ د وی كۆنفرانسێ رۆژنامه‌ڤانی دا گۆت: “پرۆسا دانانا ڤاكسینێ ژ لایێ مامۆستایانڤه یا باشه و به‌رده‌وامه، هه‌تا نوكه نێزیكی 100 هزار مامۆستایان ڤاكسین یا دانایی”.
وه‌زیرێ په‌روه‌ردێ د وی كۆنفرالنسی دا باسێ بلندكرنا پله‌یێن مامۆستایان كر و گۆت: “بلندكرنا پله‌یێن مامۆستایان وه‌كو ماف، مافێ هه‌موو فه‌رمانبه‌ره‌كی یه، به‌لێ ئه‌ڤ بابه‌ته ب تنێ ب وه‌زاره‌تا په‌روه‌ردێ ڤه گرێدایی نینه، دڤێت ل سه‌ر بنه‌مایێ هه‌لسه‌نگاندنێ بیت و ل به‌رچاڤ وه‌رگرتنا ره‌وشا دارایی بیت، ئه‌و هه‌لسه‌نگاندنه ژی ژ لایێ وه‌زاره‌تا په‌روه‌ردێ ب تنێ ڤه نینه”.
