وه‌زیرێ په‌روه‌ردێ: سبه‌ی دێ ده‌واما قوتابخانان هێته ده‌ستپێكرن
هه‌ولێر، قائید میرۆ
بڕیاره سبه‌ی رۆژا سێشه‌مبی ئێكه‌م رۆژا سالا نوویا خواندنێ بهێته ده‌ستپێكرن و ئه‌ندامه‌كێ لیژنا په‌روه‌ردێ ژی ئاماژه‌كر، نابیت ب چو شێوه‌یه‌كی پرۆسا خواندنێ بهێته گیرۆكرن هه‌روه‌سا دبێژیت، ژڤانێ هه‌لبژارتنان یێ گونجای نینه بۆ كه‌رتێ په‌روه‌ردێ و دێ كاریگه‌ری هه‌بیت لسه‌ر راگرتنا ده‌وامێ بۆده‌مێ چه‌ند رۆژان، به‌لێ دڤێت پلان هه‌بیت كاریگه‌ریێن زۆر نه‌بن بۆر اگرتنا ده‌وامێ، وه‌زیرێ په‌روه‌ردێ ژی ئاشكراكر، قوتابی دشێن ب رێیا ئه‌لكترۆنی و ئونلاینژی به‌رده‌وامیێ بده‌نه خواندنا ئه‌ڤساله.
موسلم عه‌بدولا، ئه‌ندامێ لیژنا په‌روه‌ردێ لپه‌رله‌مانێ كوردستانێ بۆ رۆژناما ئه‌ڤرۆ دیاركر” ئه‌م دگه‌ل ده‌ستپێكرنا سالا نوویا خواندنێ ینه، مخابن سالا بۆری زیانێن مه‌زن ب كه‌رتێ په‌روه‌ردێ گه‌هشتینه و كاریگه‌ری لسه‌ر ئاستێ قوتابیان هه‌بوویه، چونكه پرۆگرام نه‌هاتینه ته‌مام كرن و تنێ بۆ ماوه‌یه‌كێ كێم ده‌وام هاتبووكرن، ئه‌ڤێ چه‌ندێ كاریگه‌ری هێلاینه سه‌ر كه‌رتێ په‌روه‌رده و فێركرنێ، بێگومان ئه‌و كاریگه‌ریژی دێ دوماهیێ ده‌ركه‌ڤن، واته پرۆسا په‌روه‌ردێ پاشڤه زڤڕیه و كۆرۆنایێ زیانێن مه‌زن هه‌بوون لسه‌ر راگرتنا ده‌وامێ و ڤه‌قه‌تیانا قوتابیان ل قوتابخانێ، پێدڤیه پێداگیری بهێته‌كرن سبه‌ی رۆژا سێشه‌مبی ده‌ست ب پرۆسا خواندنێ بهێته‌كرن و ده‌وام بهێته ده‌ستپێكرن، بێگومان ده‌ستپێكا سالا نوویا خواندنێ بۆده‌مێ سێ حه‌فتیان دێ قه‌ره‌بوویا سالا بۆری هه‌بیت و قوتابی دێ هه‌ر به‌رده‌وامیێ ده‌نه ته‌مام كرنا پرۆگرامێن سالا بۆری یا خواندنێ، گوره‌ی بڕیارا وه‌زاره‌تێ حه‌فتیێ شه‌ش رۆژان دێ ده‌واما قوتابخانان هێته‌كرن و چو پلانێن به‌دیل نینه بۆڤێ چه‌ندێ حه‌فتیێ چه‌ند رۆژه‌كێن كێم ده‌وام بهێته‌كرن یانژی نیڤ ب نیڤ ده‌وام بهێته‌كرن.
ئالان حه‌مه سه‌عید وه‌زیرێ په‌روه‌ردێ گۆت” سبه‌ی دێ ده‌وام لسه‌رانسه‌ری هه‌رێما كوردستانێ هێته ده‌ستپێكرن و هه‌گه‌ر سه‌میانێن قوتابی بخوازن رێنمایێن خۆپارێزیێ بجه بینن ئه‌ڤه دشێن ب رێیا خواندنا ئونلاین یانژی ئه‌لكترۆنی سالا نوویا خواندنێ بڕێڤه‌ببه‌ن، ده‌واما قوتابخانان دێ گوره‌ی رێنمایێن خۆپارێزیێ بیت و پێدڤیه قوتابی و مامۆستا هه‌ردووك كه‌مامێ گرێده‌ن، داخوازێ ل مامۆستایانژی دكه‌ین سه‌ره‌دانا بنگه‌هێن ساخله‌میێ بكه نبۆ وه‌رگرتنا ڤاكسینا دژی كۆرۆنایێ، چونكه هه‌تا نوكه 35%ێ یا مامۆستایان ڤاكسین وه‌رگرتیه و وه‌زاره‌تا ساخله‌میێ ئاسانكاریێن زۆر بۆ ته‌خا مامۆستا كرینه بۆڤێ چه‌ندێ زۆرترین مامۆستا ڤاكسینێ دانن.
ئه‌ڤی ئه‌ندامێ لیژنا په‌روه‌ردێ ئاماژه‌كر”هه‌رچه‌نده حوكمه‌تا عێراقێ بڕیاردایه ده‌وام نه‌هێته ده‌ستپێكرن هه‌تا پشتی هه‌لبژارتنان، به‌لێ نابیت هه‌رێما كوردستانێ بڕیاره‌كا وه‌سا بده‌ت، چونكه ئێكجار دێ پاشكه‌ڤین ل سالا خواندنێ و قه‌ره‌بوویا سالا بۆری ژی دوڤدا هه‌ر ناهێته‌كرن، چونكه ده‌لیڤه نامینیت بۆ پرۆگرامێن هه‌ردو سالێن خواندنێ، مخابن ژڤانێ هه‌لبژارتنان دێ ئالۆزیێ په‌یداكه‌ت و بۆده‌مێ چه‌ند رۆژان دێ ئاڤاهیێن قوتابخانان بۆ بنگه‌هێن ده‌نگدانێ بهێنه بكارئینان، چونكه هه‌شتی هه‌یڤا داهاتی دێ ده‌نگدانا ئاواره‌یان بڕێڤه‌چیت و 10ی هه‌یڤێ ژی ده‌نگدانا گشتی، به‌س دشێن پلانه‌كا رێكو پێك دانن، هه‌تا بكار ئینانا قوتابخانان بۆ مه‌ره‌مێن هه‌لبژارتنان كاریگه‌ریێن زۆر نه‌بن و نه‌بیته ئه‌گه‌ره‌ك بۆ ده‌مه‌كێ درێژ ده‌رگه‌هێن قوتابخانا بهێنه گرتن، ئه‌ز باوه‌رم حوكمه‌تژی هه‌تا نوكه یا رژده لسه‌ر پرۆسا خواندنێ و هه‌موو بزاڤه‌ك بۆ به‌رده‌وامیدان ب خواندنێ دێ هێته‌كرن، ده‌م زۆر مایه بۆ هه‌لبژارتنان و نابیت خواندنا ئه‌ڤساله‌ژی بكه‌نه قوربانی پرۆسا هه‌لبژارتنان.
