وه‌ك پێدڤی چاڤدێریا زارۆیێن بێ سه‌میان ل قه‌زا ئامێدیی ناهێته كرن
ئامێدیێ، محمود نهێلی
ژبه‌ر نه‌بوونا چ جهێن ڤه‌حه‌واندنێ شایسته‌یێن دارایی و موچه‌یه‌كی دیاركری ئاریشه بۆ زارۆیێن بێ سه‌میان ل سنورێ قه‌زا ئامێدیێ دروستبووینه.
بارز عه‌بدولعه‌زیز وه‌ك ڤه‌كوله‌رێ جڤاكی بو رۆژناما ئه‌ڤرۆ دیار كر، نه‌بوونا چو بنگه‌هێن ڤه‌حه‌واندنا زارۆیێن بێ سه‌میان ل ده‌ڤه‌رێ ئاریشه بۆ وان زارۆیان دروست كرینه یێن دایبابێن خوه ژ ده‌ست دای، ب چ رێكا هه‌بیت و ماینه بێ خودان و گۆت: ڤه‌كرنا بنگه‌هه‌كی بۆ ڤان زارۆیان گرنگیا خوه هه‌یه و ئێك ژلایێ وێ یه‌كێ كو ئه‌ڤ زارۆیه هه‌ست پێ بكه‌ت گرنگی پێ دهاته دان و یا دویێ ژی دبیته ئه‌گه‌رێ به‌رده‌ست بوونا داتایان بو وێ یه‌كێ هه‌ر خێرخوازه‌ك یان ژی رێكخراوه‌ك هاریكاریێ بكه‌ت دێ ئامار به‌رده‌ست بن و كه‌س بێ به‌هر نابیت.
و ناڤهاتی داخاز ژی كر، پتر گرنگی ب ڤێ ده‌ڤه‌رێ بهێته دان بۆ وێ یه‌كێ ئه‌ڤ زارۆیه ژی مفادار بن و بگه‌هنه مافێ خوه چونكه ل سه‌نته‌رێ باژێرێ دهوكێ رێكه‌كا دوره و چێدبیت زوو ب زوو كه‌س و كارێن خوه نه‌بینڤه .
ژلایێ خوه ڤه ژی نه‌زیر عه‌لی جێگرێ رێڤه‌به‌رێ چاڤدێریا خێزانی ل ئامێدیێ بۆ رۆژناما ئه‌ڤرۆ دیاركر، كو ل سنورێ رێڤه‌به‌ریا وان هه‌ژماره‌كا زارۆكان هه‌نه و نه‌هاتینه ته‌ماركرن چونكو ل به‌ری 2014 تومار كرنا ڤان كه‌سان هه‌بوویه ل به‌شێ خێزانا و حكومه‌تێ موچه‌كی هه‌یڤانه بۆ ته‌رخاكرن بوون و گۆت : پشتی سالا 2014 ئه‌ڤ هاریكاریه هاتینه راوه‌ستاندن و توماكرنا ناڤان ژی ده‌ست پێ نه‌هاتیه كرن.
و ئاشكرا كر، وان وه‌ك كاره‌كی خوه‌به‌ش د توماركرنێ دا ل ڤێ داویێ 38 زارۆیێن بێ سه‌میان و بێ دایباب هاتینه توماركرن و ژ وان ژی بارا پترێ یێن ده‌ڤ خاله‌تێ یان مه‌تێ یان ژی مامێ و گۆت: هنده‌ك كه‌س هه‌نه دایباب یان ژی باب یان دایك هه‌یه لێ نه‌دایك ده‌ڤه و نه باب ب ڤی ره‌نگی هه‌بوونا دایبابان چ رامانا خوه نینه بو وان زارۆیان .
و ته‌كه‌ست كر، ئه‌ڤ زارۆیه یێن بێ به‌هرن ژ هه‌ر هاریكاریێن حكومه‌تێ و ده‌زگه‌هـ و رێكخراوێن نافخوه‌یی و نیڤ ده‌وله‌تی و وه‌ك پێدڤی هاریكاریا وان ناهێته كرن.
و ده‌ربارێ جهێ ڤه‌حه‌واندنا ڤان زارۆیان ژی ناڤهاتی ئاشكراكر، كو نوكه وان چ جهه‌كێ ڤه‌حه‌واندنێ نینه و گۆت: نوكه ل سه‌نته‌رێ پارێزگه‌هێ هه‌یه لێ هند زارۆیان نه‌ڤێت بچنه وێرێ و كه‌س و كارێن وان ناهێلن بچنه جهێن ب ڤی ره‌نگی و ب كێماسی دبینن و یا باش ئه‌وه بو ڤه‌حه‌واندنا ڤان زارۆیان ل دووڤ ره‌ئی و بوچونا وان ب خوه بیت.
