وه‌لاتی: ئه‌م ناهێلین پرۆژه بێ رازیكرنا مه بهێته چێكرن
شێلادزێ، نه‌وزاد هلۆری:
بریاره ئێك ژ مه‌زنترین پرۆژێن گه‌شتیاری ل سه‌ر رووبارێ ئاڤا شین ل شێلادزێ بهێته چێكرن، به‌لێ وه‌لاتی گله‌ی دكه‌ن كو ل سه‌ر مولكێن وان دێ هێته چێكرن و وه‌كو پێدڤی قه‌ره‌بوویا وان نه‌هاتیه‌كرن، خودانێ پرۆژه‌ی ژی دیاركر كو د ده‌ما دوو سالان دا پرۆژه دێ هێته چێكرن و هه‌موو پێرابوونێن قانونی بۆ چێكرنا پرۆژه‌ی گرتینه‌به‌ر.
كه‌مال ره‌شید، خودانێ ئێك ژ ئه‌ردێن دكه‌ڤیته به‌ر پرۆژه‌ی بۆ ئه‌ڤرۆ گۆت: (ده‌مێ لژنا پیڤانا ئه‌ردی هاتیه پێش ئه‌ردی، ب مه‌ره‌ما ڤه‌دیتن بۆ پرۆژه‌ی، پشكه‌ك ژ ئه‌ردی نه پیڤایه و بهانه‌یا وان ژی ئه‌و بوو كو ئه‌و ئه‌رد شیڤه، ده‌مێ مه ئه‌رد ل گه‌ل حوكمه‌تێ ته‌سویه‌كری مه رێكه‌فتن هه‌یه كو هه‌ر پرۆژه‌كێ ل سه‌ر موكێن گوندێ سیریێ بهێته چێكرن دڤێت ب ره‌زامه‌ندی یا مه بیت و رێژا 15% ژی بۆ مه بیت، ئه‌ڤه دوو ساله كار ل سه‌ر وێ یه‌كێ دهێته‌كرن كو پرۆژه‌ی ده‌ست پێ بكه‌ن، به‌لێ ئه‌م رازی نابین هه‌تاكو حوكمه‌ت یان خودانێ پرۆژه‌ی مه رازی كه‌ت و هه‌ر كه‌سه‌كێ ئامیرێن خوه بینیت ناڤا ئه‌ردی دا كو پرۆژه‌ی ده‌ست پێ بكه‌ت ئه‌م دێ ده‌رئێخین وه‌كی چه‌وا پێشتر جاره‌كێ هاتن و ده‌ست پێ كری و مه ده‌رئێخستین).
رێكان حسێن ئه‌سعه‌د، وه‌به‌رهێنه‌ر و خودانێ پرۆژه‌ی دیاركر كو هه‌موو پێرابوونێن قانونی یێن پرۆژه‌ی دوماهی هاتنه و ده‌ست ب پرۆژه‌ی هاتیه كرن و بۆ رۆژناما ئه‌ڤرۆ گۆت: (پرۆژه پرۆژه‌یه‌كێ گه‌شتیاریێ وه‌به‌رهێنانێ یه و دێ خزمه‌ته‌كا باش بۆ خه‌لكێ ده‌ڤه‌رێ كه‌ت كو هه‌ند تێدا كار بكه‌ن هه‌تاكو دروست دبیت، هه‌ند ژی تێدا كار كه‌ن پشتی دوماهی دهێت، پرانیا ده‌لڤێن كاری ژی دێ بۆ خه‌لكێ ده‌ڤه‌رێ بخوه بن، نوكه ده‌ست ب پرۆژه‌ی هاتیه‌كرن، پشتی ده‌واما سه‌رێ سالێ داوی دهێت و ده‌وام ده‌ست پێ دكه‌ت ڤه دێ ب جدی كار كه‌ین داكو ب زوترین ده‌م پرۆژه بهێته دروستكرن و بكه‌ڤیته د خزمه‌تا خه‌لكێ ده‌ڤه‌رێ و كوردستان و عیراقێ دا).
ل بارا گله‌ی یا وه‌لاتیان ژی گوت: (پشتی نه‌رازیبوونا وه‌لاتیان، لژنه‌ك هاتیه پێكئینان ژلایێ رێڤه‌به‌ریا گشتی یا باژێرڤانیان ل پارێزگه‌ها دهۆكێ و ئه‌وان سه‌ره‌دانا باژێرڤانیا شێلادزێ كر، د ئه‌نجامێ كارێ لژنێ دا دیاربوو كو وه‌لاتیان چوو ماف ل سه‌ر ئه‌ردی نه‌ما و قه‌ره‌بوویا خوه ب نێزیكێ 200 ملیون دیناران وه‌رگرتیه وه‌كی بهایێ داروباری ل گه‌ل دانا چه‌ندین پارچێن ئه‌ردی).
ئه‌ندازیار سه‌ربه‌ست مێزی، سه‌رۆكێ باژێرڤانیا شێلادزێ دیار كر، ئه‌وان پێشتر لژنه‌كا تایبه‌ت بۆ دووڤچوونا گله و گازنده و ڤه‌دیتنا جهی و قه‌ره‌بووكرنا خودان مولكان پێكئینایه و بۆ ئه‌ڤرۆ گۆت: (ب گۆره‌ی ئه‌وێ لژنێ خودانێن مولكان هه‌موو هاتینه قه‌ره‌بوكرن، پارچه ئه‌رد ل گه‌ل پارێ داروبارێ وان وه‌ك قه‌ره‌بوو بۆ وان هاتیه‌دان، د نوكه دا چو كه‌سێ ماف ل سه‌ر مولكیه‌تا ئه‌ردێ پرۆژه‌ی نه‌مایه و هه‌ركه‌سێ رێگریێ ل چێكرنا پرۆژه‌ی بكه‌ت، دێ پێرابوونێن قانونی هه‌مبه‌ر وان گرینه‌به‌ر، پرۆژه د خێرا خه‌لكێ ده‌ڤه‌رێ دایه و دێ چه‌ندین ده‌لیڤێن كاری بۆ وه‌لاتیان دابین كه‌ت).
ژلایه‌كێ دن ڤه كوردۆ ئێحسان، رێڤه‌به‌رێ گشتیێ وه‌به‌رهێنانێ ل پارێزگه‌ها دهۆكێ ل بارا پرۆژه‌ی گوت: (د چارچوڤێ بزاڤێن حوكمه‌تا هه‌رێما كوردستانێ بۆ گه‌شه‌پێدانا كه‌رتێ وه‌به‌رهێنانێ و بزاڤكرن بۆ زێده‌تر دانا ده‌لیڤێن كاری و ئێخستنا سه‌رمایه‌ی خزمه‌تا گشتی دا، چه‌ند موله‌تێن وه‌به‌رهێنانێ ل ده‌ڤه‌رێن جودایێن پارێزگه‌ها دهۆكێ ب وه‌به‌رهێنه‌رێن خومالی هاتینه‌دان، ئێك ژ وان ژی پێدانا موله‌تێ یه بۆ پرۆژێ مومه‌لگه‌ها گه‌شتیاری یا شێلادزێ، سه‌رمایێ پرۆژه‌ی دوو ملیون و 762 هزار و 400 دولاره و دێ ل سه‌ر رووبه‌رێ 256 هزار و 65 مه‌ترێن چوار گوشه ژلایێ وه‌به‌رهێنه‌ره‌كێ ده‌ڤه‌رێ هێته چێكرن).
زێده‌تر گۆت: (پرۆژه پێكدهێت ژ 22 یه‌كه‌یێن موتێل و كوشك و هولێن چالاكیان و خارنگه‌ه و كافیتریا و ماركێت و پارچك و باخچه‌یان، ئه‌ڤ یه‌ك دێ ده‌رفه‌تا كاری بۆ هژماره‌كا خه‌لكی په‌یدا كه‌ت و گه‌شێ ده‌تن كه‌رتێ وه‌به‌رهێنانێ ل پارێزگه‌ها دهۆكێ و به‌رێ گه‌شتیاران ژی ده‌ته وێ ده‌ڤه‌رێ).
ل دیڤ پێزانینان پرۆژه دێ دده‌ما دوو سالان یان سێ سالان دا هێته چێكرن و دكه‌ڤیته سه‌ر رووبارێ ئاڤا شین ل نێزیك پرا بالندا.
