وه‌لاتێن عه‌ره‌بی داخوازا ترامپی ره‌تکر
پێنج وه‌لاتێن عه‌ره‌بی ل پایته‌ختێ مسرێ کۆمبوون و ل دۆر پاشه‌رۆژا ئاکنجیێن غەزە دانوستاندن کرن و پشتی کۆمبوونێ ژی راگه‌هاندن کو دڤێت ب ئاگربه‌ستا د ناڤبه‌را ئسرائیلێ و حەماسێ دا هه‌موو خەلکێ فەلەستینێ یێن کو ژ بەر شەڕی ژ باژێر و جهێن ئاکنجیبوونا خوە کۆچبەری دەڤەرێن دی بووینە، جارەکا دی ڤەگەرنە ڤە جهێن خوە و گرنگە دەست ب ئاڤەدانکرنا غەزە ژی بهێتە کرن.
د کۆمبوونێ دا کو وه‌زیرێن ده‌رڤه یێن وه‌لاتێن عەرەبستانا سعوودیێ، مسرێ، ئوردنێ، ئیماراتێ، قه‌ته‌رێ و سکرتێرێ گشتی یێ کۆمکارا عه‌ره‌بی به‌رهه‌ڤبوون، داخواز ئانکۆ پێشنیازا دۆنالد ترامپ سه‌رۆکێ ئه‌مریکا بۆ غەزە گه‌نگه‌شه کرن و پێشنیازا ترامپی رەتکرن و دیار کرن نابیت خەلکێ غەزە ل ژێر ناڤێن جودا جودا رەوانەی وەلاتێن دی بهێتە کرن، ئەو یەک دێ کاریگەریا خوە یا گەلەک خراب ل سەر پاشەرۆژا غەزە هەبیت و ژ بەر ڤێ یەکێ ژی ئەو پێشنیازا سەرۆکێ ئەمریکا رەت دکەن.
