وه‌لید حه‌ز ناكه‌ت ناڤه‌رۆكا فلمێ خوه یێ نوو ئاشكرا كه‌ت
شاكر ئه‌تروشی:
ده‌رهێنه‌ر(وه‌لید محه‌مه‌د تاهر) كو ئه‌ڤه بیست ساله ل وه‌اتێ هوله‌ندا دژیت، د دیداره‌كێ دا بۆ رۆژناما ئه‌ڤرۆ دیاركر كو دووماهی فلمێ وی به‌ری دو هه‌یڤان ل وی وه‌لاتی هاتیه نیشادان و به‌ری دو رۆژان ژی ژ نڤیسینا چیرۆكا كورته فلمه‌كێ درێژ ب دووماهی هاتیه لێ ئه‌و نه‌شێت نوكه به‌حسێ ناڤه‌رۆكا وی فلمی بكه‌ت هه‌تا ده‌ست ب وێنه‌كرنێ بهێته كرن.
ناڤبری كو خه‌لكێ باژێرێ دهۆكێ یه و ده‌رچۆیێ پشكا ده‌رهێنانا شانۆیێ یه ل په‌یمانگه‌ها هونه‌رێن جوان ل دهۆكێ، هێشتا گۆت: ئه‌و فلمێ به‌ری دو هه‌یڤان هاتیه نیشادان ل دۆر ره‌وشا په‌نابه‌ران بوو، چیرۆكا فلمی ژلایێ (دێنس) كو دوسته‌كێ مه‌یه هاتبوو نڤیسین، ئه‌ز ب كارێ ده‌رهێنانێ راببووم و بالیۆزێ په‌نابه‌ران ل هوله‌ندا (هارس) وه‌ك ئه‌كته‌ر ب رۆلێ سه‌ره‌كی راببوو.
ل دووماهیێ گۆت: ئه‌ز نوكه قوتابیێ پشكا ده‌رهێنانا فلمامه ل باژێرێ ئه‌مستردام، ده‌مێ خواندنێ دو سالن، ساله‌ك ب دووماهی هاتیه و نوكه ئه‌ز یێ ل قوناغا دویێ و ده‌مێ ده‌ردچین دێ مه ماف هه‌بیت ببینه ماموستا و وانێن هونه‌ری ب تایبه‌ت ژی دبۆارێ ده‌رهێنانا فلمان دا بێژین، هه‌روه‌سا دێ رێ ب مه هێته دان كو كۆمپانیێن مه‌زن یێن هونه‌ری ژی ڤه‌كه‌ین.
