وه‌لید سه‌لمان: ل به‌سرا دێ بزاڤا سه‌رێ لیستێ كه‌ین
ئه‌ڤرۆ،
چاڤه‌ڕێ یه ئه‌ڤرۆ ل ده‌مژمێر دو یێ پشتی نیڤرۆ تیما ته‌پا پیێ یا یانا دهۆك ل یاریگه‌ها فه‌یحا یا باژێرێ به‌سرا ببیته مێڤانا یانا مه‌سافی ئه‌لجنوب ژ چارچووڤێ هه‌ڤڕكیێن گه‌ڕا ده‌هێ و به‌ری دووماهیا قۆناغا ئێكێ بۆ یانێن پلا ئێكا ئیراقێ ب هیڤیێن ده‌ستڤه ئینانا ئه‌نجامه‌كێ باش و پاراستنا سه‌رێ لیستا خولێ.
تیما دهۆكێ ب 20 خالان رێزا ئێكێ ژ سه‌رجه‌مێ شه‌ش سه‌ركه‌فتن، دو وه‌كهه‌ڤی و خوساره‌تیه‌كێ هه‌مبه‌ری وێ خودانێن ئه‌ردی ب 14 خالان رێزا پێنجێ دهێت، ئه‌ركێ یانا پارێزگه‌هێ ب سانه‌هی نابیت هه‌مبه‌ری تیمه‌كێ كو د ناڤ ئه‌ردێ خوه دا بتنێ ئێك خوساره‌تی دایه ل سه‌رجه‌مێ نه‌ه یاریێن بوری دا و دێ بزاڤێ كه‌ت هیڤیێن خوه بۆ هه‌ڤڕكییا پلێتا ده‌ربازبوونێ گه‌ش بكه‌ت، ژلایێ خوه‌ڤه دهۆك دێ بزاڤێ كه‌ت خوه ژ هه‌ڤڕكا خوه حدود دووربێخیت ئه‌وا ب 19 خالان رێزا دویێ دهێت.
لدور دووماهی به‌رهه‌ڤیێن تیما دهۆكێ وه‌لید سه‌لمان كاپتنێ تیمێ بۆ رۆژناما ئه‌ڤرۆ گوت: یاری ل گه‌ل مه‌سافی ئێك ژ تاقیكرنێن بهێزن دناڤ ئه‌رد و جه‌ماوه‌رێ وێ دا، له‌ورا ئه‌ركێ مه ب زه‌حمه‌ته و دێ هه‌ڤڕكیه‌كا بهێز هه‌بیت، مه پلانێن باش هه‌نه و بۆ سه‌ركه‌فتنێ چووینه باژێرێ به‌سرا و هه‌موو یاریزان به‌رهه‌ڤن و رژدن بۆ ده‌ستڤه‌ئینانا ئه‌نجامه‌كێ باش، هه‌رچه‌نده هێرشبه‌رێ گه‌نج سیابه‌ند عه‌گید یاریێ ناكه‌ت ژبه‌ر هه‌بوونا كارتێن زه‌ر لێ گه‌شبینم دێ ب ئه‌نجامێ سه‌ركه‌فتێ بزاڤێ بۆ كه‌ین و سه‌رێ لیستێ پارێزین.
ژ یاریێن دی یێن ئه‌ڤرۆ، كۆفه- حدود، عه‌له‌م- عه‌فه‌ك، مرور- دیفاع ئه‌لمه‌ده‌نی، سوق ئه‌لشیوخ- میسان، رومادی – سلیخ.
