وەزارەتا بەرەڤانیا عیراقێ: چەکێ بێ دەنگ نه‌بوو ھەرێما کوردستانێ بوو
ئەڤرۆ نیوز، ئەیاد بەرواری:
وەزارەتا بەرەڤانیا عیراقێ ئەڤرۆ شەمبیێ راگەھاند ئەو ھەردو فرۆکێن ل فرۆکخانا بەغدا یا نێڤدەولەتی یێن چەکێ بێ دەنگ تێدا ھاتینە دیتن، ب سەر ھێزێن کەنەدی و سویدی ڤەنە.
وەزارەتا بەرەڤانیا عیراقێ ل رۆژا پێنجێ ڤێ مەھێ رۆھنکرنەک بەلاڤکربوو و تێدا ھاتبوو کو ل دووڤ فەرمانا فەرماندێ گشتیێ ھێزێن چەکدار و سەرۆکێ وەزیران (حەیدەر عەبادی) ئەو چەکێ دەستووردای یێ کو ژ ھەردو وەلاتێن کوێت و تورکیا بۆ ھەرێما کوردستانێ ھاتی، یێ ھاتیە ڤەگەراندن ڤە پشتی ھندەک دەبانجێن بێ دەنگ ھاتینە دیتن کو د لیستێن وی چەکێ دەستووردای دا نەبوو.
وەزارەتا ناڤبری د بەیانا خوە یا ئەڤرۆ شەمبیێ دا بێژیت” ئەو ھەردو فرۆکە ژ بنگەھێن خوە ژ تورکیا و کوێتێ یێن ھاتین و ئێک یا کەنەدی یە و یا دی سویدی یە و ھەردو فرۆکان چەک و کەلوپەلێن ھەردو ھێزێن کەنەدی و سویدی ئیناینە، نەبوو ھێزێن لەشکری و ئەمنی یێن ھەرێما کوردستانێ نە”.
