وەزارەتا خواندنا بلند مەرجەکێ نوو بۆ دانا ناسناڤێ زانستی ب جە دئینیت
ئەڤرۆ نیوز:
وەزارەتا خواندنا بلند و ڤەکۆلینێن زانستی مەرجێ پێدانا ناسناڤێ زانستی یێ مامۆستایێن ھاریکار بۆ ھەلگرێن باوەرناما ماستەرێ ب زەحمەت دئێخیت و ئەڤ بڕیارە ل دەستپێکا ڤێ مەھێ یا کەتیە د وارێ ب جە ئینانێ دا.
ل دووڤ نڤیسارەکا وەزارەتا خواندنا بلند و ڤەکۆلینێن زانستی کو ئیمزایا د. یوسف گۆران، وەزیرێ خواندنا بلند ل سەرە ئاشکرا کریە کو مەرجەکێ نوو بۆ پێدانا ناسناڤێ زانستی (مامۆستایێ ھاریکار) بۆ ھەلگرێن باوەرناما ماستەرێ یێ ھاتیە دانان، پێدڤیە ئاستێ شیانێن زمانێ ئینگلیزی یێ ھەلگرێن باوەرناما ماستەرێ بەری وەرگرتنا ناسناڤێ زانستی مامۆستایێ ھاریکار د پێنج ئەزموونێن IELTS یان ھەفکیفێ وێ د ئەزموونا ستانداردێن دی یێن شیانێن زمانی کێمتر نەبیت.
د نڤیسارا ناڤبری دا ئاماژە ب وێ چەندێ ژی دایە کو پێدڤیە ھەلگرێن باوەرناما ماستەرێ ئێک ژ ئەزموونێن ستانداردێن شیانێن زمانێ ئینگلیزیێ پێشکێش بکەت کو پێکھاتینە ژ (PEARSON, IBT TOEFL, IELTS).
ل دووماھیا نڤیسارا وەزارەتا خواندنا بلند دا ھاتیە ئاشکرا کرن کو پشتی دەستپێکرنا ڤان مەرجان سمینارێن تایبەت ژ لایێ زانکۆیێ ڤە بۆ ھەلسەنگاندنا شیانێن زانستی و ئەکادمیێن ھەلگرێن باوەرناما ماستەرێ دێ ھێنە ئەنجامدان و ناسناڤێ مامۆستایێ ھاریکار دێ ب بەربژارێن سەرکەفتی ھێتە دان.
