وەزارەتا دارایی رۆهنكرنەك ل دۆر پڕۆژەیێ «هەژمارا من» بەلاڤكر
وەزارەتا دارایی و ئابووری یا هەرێما كوردستانێ راگەهاندنەك ل دۆر پرۆسێسا بەنكیكرنا مووچەی بەلاڤكر و تێدا هاتیە: پرۆسێسا بەلاڤكرن و سەرپەرشتیا مووچەیێ فەرمانبەران ل دووڤ پرەنسیپێن گشتی یێن سیستەمێ فیدرالی د دەستهەلات و تایبەتمەندیێن وەزارەتا دارایی و ئابووری یا هەرێمێ دانە و دستوورێ ئیراقێ ژی رێك ب ڤێ چەندێ دایە.
وەزارەتا دارایی و ئابووری د راگەهاندنا خوە دا ئاشكرا كریە، بەنكیكرن و پێدانا مووچەی ب شێوەیەكێ راستەوخۆ ژ لایێ بەغدایێ ڤە بۆ فەرمانگەهێن هەرێمێ، ب رەنگەكێ جودا بوویە بابەتێ دانوستاندنێ و چەندین شرۆڤە بۆ دهێنە كرن، لەو مە ب پێدڤی دیت چەند رۆهنكرنان بدەین، ژ وان:
1- وەزارەتا دارایی و ئابووری یا هەرێمێ ئالیێ ئێكانە یێ بەرپرس و تایبەتمەندە بۆ ب رێڤەبرنا مامەلەیێن دارایی و ژمێریاری ل گەل حكومەتا ناڤەندی و وەزارەتا دارایی یا حكومەتا فیدرال.
2- وەزارەتا دارایی و ئابووری ل گەل وەزارەتا دارایی یا حكومەتا فیدرال رێككەفتییە، كو هەتا دووماهییا ئەڤ سالە، هەمی كێشەیێن تەكنیكی یێن لیستا مووچەیێ فەرمانبەرێن هەرێمێ چارەسەر ببن.
3- ل دووڤ كۆنووسا كۆمبوونا جڤاتا وەزیران یا هەژمارە 113 یا 2ی تەباخا 2023ێ د برگەیا سیێ دا، سەرۆكێ جڤاتا وەزیران و جێگرێ وی و وەزیران بڕیار ل سەر پڕۆژەیێ «هژمارا من» دایە و تەكەز ل وێ چەندێ هاتیە كرن، كو دڤێت هەمی وەزارەت پشتگیریا پرۆسەیا دیجیتالكرنا خزمەتگوزارییان و سەرخستنا «هژمارا من» بكەن.
4- ل دووڤ بڕیارا دادگەها فیدرالی، هەمی بەنكێن پشكدار د «هژمارا من» دا د رێپێدایینە و هەمی د پرۆسەیا «تەوتین»ێ دا پشكدارن، چو كێشەیێن یاسایی و تەكنیكی ل بەرانبەری وان بانكان نینن، هەتا پرۆسەیا «تەوتین»ێ د چارچوڤێ پڕۆژەیێ «هژمارا من» دا بجهبینن
د یسا د راگەهاندنا وەزارەتێ دا هاتییە؛ هەتا نوكە 700 هزار فەرمانبەر و مووچەخۆران د ڤی پڕۆژەیی دا خۆ تۆماركریە و هەیڤا بۆری ژی 153 هزاران ب رێكا «هژمارا من» مووچە وەرگرتییە، پێدڤیە هەمی وەزارەت و سازیێن حكومەتێ د بجهئینانا پڕۆژەیێ «هژمارا من» دا د بەردەوامبن، هەتا تمامبوونا پرۆسەیێ ل سالا 2025ێ یان ژی دەرچوونا بڕیارەكا دی.
