وەزارەتا دەرڤە یا ئەمریكا: گرنگە كارێن بۆڕییا پەترۆلا ئیراقێ و توركیا بهێنە دەستپێكرن
پەیڤدارەكێ وەزارەتا دەرڤەیا ئەمریكا راگەهاند: گرنگە كارێن بۆرییا پەترۆلا ئیراقێ و توركیا بهێنە دەستپێكرن.
وی پەیڤدارێ گوت ژی» هەروەسا یا گرنگە حوكمەتا ئیراقێ، حوكمەتا هەرێما كوردستانێ و ئالیێن پەیوەندیدارێن دی ئێكسەر دەست ب كارێن بۆرییا ئیراقێ و توركیا بكەن».
دیاركری» كارێن سێ كۆمپانیێن ئەمریكی ژ ئەگەرێ دائێخستنا بۆرییا پەترۆلا ئیراقێ و توركیا راستەوخوە زیان گەهشتینێ».
هەڤدەم راگەهاند ژی» مە بەردەوام داخواز ژ هەموو ئالییان كریە پرسان چارەسەر بكەن و پاشئێخستنا وان هەتا دەمەكێ نەدیار قەبوول ناكەین».
ل دۆر زیانێن ئابۆریێن ئیراقێ پشتی راگرتنا هنارتنا پەترۆلا هەرێما كوردستانێ، وی پەیڤدارێ وەزارەتا دەرڤەیا ئەمریكی گوت» دائێخستنا وێ بۆرییا پەترۆلی پێشكەفتنا ئابۆرییا ئیراقێ یا لاوازكری و بوویە ئەگەرێ لاوازبوونا وەبەرئێنانا ئەمریكی و هاریكارییا ب هێزبوونا هەژموون و كاریگەرییا ئیرانێ، لەوما پێدڤییە ئەڤ پرسە ب لەز بهێتە چارەسەركرن».
ل دووماهیێ گوت» بۆرییا پەترۆلا ئیراقێ و توركیا رێڕەوەكێ جهگرێ گرنگ یێ پەترۆلێ بۆ گەهشتنێ ب بازارێن جیهانی دابین دكەت كو مفا بۆ ئابۆرێ ئیراقێ و هەرێما كوردستانێ و هەروەسا وان كۆمپانیێن ئەمریكی هەیە ئەوێن ل وێرێ كار دكەن. ڤەكرنا وێ بۆریێ مفایە بۆ ئەمریكا و هەرێما كوردستانێ و ئیراقێ ب گشتی.
