وەزارەتا كارەبێ: ب تنێ ئەم دشێین 10 دەمژمێران كارەبێ بدەینە وەلاتیان
هەولێر، قائید میرۆ:
چەند رۆژەكە دەمژمێرێن دانا كارەبا نیشتیمانی كێمبووینە و پەیڤدارێ وەزارەتا كارەبێ ژی دبێژیت: د دەمێ نوكە دا، ئەم دشێین ب تنێ 10 دەمژمێران كارەبێ بدەینە وەلاتیان، چونكی پشتی هاتنا پێلا سەرمایێ خواست ل سەر بكارئینانا كارەبێ گەلەك زێدەبوویە.
ئومێد ئەحمەد، پەیڤدارێ وەزارەتا كارەبێ بۆ رۆژناما ئەڤرۆ دیار كر، د مەها بۆری دا وەزارەتا كارەبێ شیایە 16 هەتا 17 دەمژمێرێن كارەبا نیشتیمانی بدەتە وەلاتیان، بەلێ هاتنا ڤێ پێلا سەرمایێ خواست ل سەر ب كارئینانا كارەبێ زێدەبوویە و گۆت: «ژ 25 مەها بۆری وەرە ب تنێ وەزارەت شیایە 10 دەمژمێڕێن كارەبێ بدەتە وەلاتیان، چەند پلەیێن گەرمێ نزم ببن خواست ل سەر ب كارئینانا كارەبا نیشتیمانی زێدە دبیت».
ئومێد ئەحمەد گۆتژی: «هەموو سالەكێ د وەرزێ زڤستانێ دا ئاریشەیا كێمبوونا كارەبێ دوبارە دبیت، چونكی پلەیێن گەرمێ نزم دبن و وەلاتی ژی كارەبێ بۆ خۆ گەرمكرنێ بكار دئینن و ئامیرێن گەرمكرنێ دهێنە بكارئینان، وەزارەتا كارەبێ ژی شیانێن زێدەكرنا بەرهەمی نینە، ب تنێ كێمكرنا بارگرانیا ل سەر كارەبێ دبیتە ئەگەر بۆ زێدەكرنا كارەبێ».
