وەزارەتا ناڤخۆ: پێدڤیە شۆفێرێن تەكسیان بەلگەیا بێتاوانیێ هەبیت
هه‌ولێر، قائید میرۆ:
رێڤەبەرێ گشتیێ دیوانا وەزارەتا ناڤخۆ ئاشكراكر، پێدڤیە هەموو شۆفێرێن تەكسیێ بەلگەنامەیا بێتاوانیێ هەبیت و بەروڤاژی لۆگویێ تەكسیا وی ناهێتە نووكرن و دبێژیت: داخوازێ ژ وەلاتیان دكەین، هاتنوچوونێ ب تەكسیەكێ نەكەن، ئەگەر لۆگویێ خۆ نوو نەكربیت.
دكتۆر هێمن میرانی، رێڤەبەرێ گشتیێ دیوانا وەزارەتا ناڤخۆ بۆ رۆژناما ئەڤرۆ دیاركر، دەمێ لۆگویێ ترۆمبێلێن تەكسی دهێنە نووكرن، پێدڤیە شۆفێر بەلگە هەبیت، هەتا بزانین د دەمێ ئیك سال دا، دەمێ شۆفێرێ تەكسیێ بوویە چو تاوان ئەنجامداینە یان ژی نە و گۆت: «هەر شۆفێرەكێ تەكسیێ دەمێ لۆگویێ تەكسیا خۆ نوو دكەت، دڤێت بەلگەیا بێتاوانیێ بینیت و پشتڕاستبین ئەڤی شۆفێری تاوان نەكرینە، بەروڤاژی ناهێتە نووكرن، ژ بەركو خەلكێ جوراوجور هاتنوچوونێ ب تەكسیێ دكەن و نابیت شۆفێر كەسەكێ خراپكاربیت».
گۆتژی: «نوكە كارێ تەكسیان هاتیە رێكخستن و تەكسیێن هێلا دەرڤە ژ هێلێن ناڤخۆ هاتینە جوداكرن، هەر شۆفێرەكێ پێگیریێ ب بڕیارا حوكمەتێ نەكەت، دێ لێپرسین د گەل دا هێتە كرن، داخوازێ ژ وەلاتیان ژی دكەین، هاتنوچوونێ ب تەكسیێ نەكەن، ئەگەر لۆگویێ خۆ نوو نەكربیت، چونكی گومان هەیە ئەڤێ تەكسیێ تاوانەك ئەنجامدابیت، لەو لۆگویێ خۆ نوو نەكریە».
