وەزارەتا پەروەردەیێ دێ بڕیارێ ل سەر دەستپێكرنا دەواما قوتابخانـەیان دەت
دهۆك، دلۆڤان ئاكرەیی:
بەرپرسەكێ وەزارەتا پەروەردەیێ ئاشكرا كر، هەمی ئامادەكاری بۆ وەرزێ نوو یێ خواندنێ 2025 – 2026 ب دووماهی هاتینە و پێشوازی ل زێدەتر ژ ملیۆنەك و 800 هزار قوتابیان دێ هێتە كرن.
سامان سیوەیلی، پەیڤدارێ وەزارەتا پەروەردەیا حكومەتا هەرێما كوردستانێ بۆ رۆژنامەیا ئەڤرۆ گۆت: «بۆ سالا نوو یا خواندنێ، وەزارەت دشێت پێشوازیێ ل زێدەتر ژ ملیۆنەك و 800 هزار قوتابیان بكەت و هەمی ئامادەكاری بۆ دابینكرنا پێدڤیێن قوتابیان و ئامادەكرنا قوتابخانەیان دەست پێكرینە، دیسا چەندین قوتابخانەیێن نوو ئاڤاكری و یێن نووژەنكری دێ كەڤنە د خزمەتا قوتابیان دا».
گۆتژی: «د كابینەیا نەهێ دا 214 قوتابخانە هاتینە دروستكرن، هزار و 680 قوتابخانە ژی هاتینە نووژەنكرن، 629 پۆلێن نوو یێن خواندنێ ژی هاتینە دروستكرن، دیسا هەژمارەكا زۆر یا قوتابخانەیان ژی یێ د تەمامبوونێ دا و ئامادەنە بۆ ڤەكرنێ و د پاشەرۆژەكا نێزیك دا دێ هێنە ڤەكرن».
سیوەیلی زێدەتر گۆت: «بڕیارە د كۆمبوونا جڤاتا وەزارەتێ دا، سالناما خواندنێ یا ئەڤ سالە بهێتە پەسەندكرن و بڕیارا دەستپێكرنا دەواما فەرمی ل قوتابخانەیان بهێتەدان، كو سالا بۆری ل 25ی ئیلۆنێ دەوامێ دەستپێكربوو».
