وەزارەتێن خواندنا بلند ل هەرێمێ و ئیراقێ دەستپێشخەریەك راگەهاند
دهۆك، دلۆڤان ئاكرەیی:
ڕێڤەبەرەكێ گشتی ل وەزارەتا خواندنا بلند یا حكومەتا هەرێما كوردستانێ دیار كر، بۆ ئەڤ سالە یا خواندنێ، 105 قوتابیێن هەرێما كوردستانێ ل زانكۆیێن ئیراقێ هاتینە وەرگرتن و بەروڤاژی 266 قوتابیێن پارێزگەهێن ئیراقێ ناڤێن وان ل زانكۆیێن كوردستانێ هاتینە و ل هەرێما كوردستانێ دخوینن.
دكتۆر خەتاب ئەحمەد، ڕێڤەبەرێ گشتی ل وەزارەتا خواندنا بلند و ڤەكۆلینێن زانستی یا حكومەتا هەرێما كوردستانێ بۆ رۆژنامەیا ئەڤرۆ گۆت: «هەردو وەزارەتێن خواندنا بلند یا ئیراقێ و هەرێما كوردستانێ ل بەغدا دەستپێشخەرییەك ڕاگەهاندیە بۆ خواندنا قوتابیان ل زانكۆیێن ئیراقێ و هەرێما كوردستانێ، پشتی سالا 1991ێ ئەڤە ئێكەم پێنگاڤە و پلان هەیە سالێن بهێن كورسیێن خواندنێ بۆ قوتابیان ل هەرێما كوردستانێ و ئیراقێ بهێنە زێدەكرن، ئەڤ گاڤە پشتی 34 سالان، بۆ جارا ئێكێ یە قوتابیێن هەرێما كوردستانێ دشێن ل زانكۆیێن ئیراقێ و بەروڤاژی وێ چەندێ قوتابیێن پارێزگەهێن ئیراقێ ژی دشێن ل زانكۆیێن هەرێما كوردستانێ بخوینن، بۆ سالا خواندنێ 2025 – 2026 هزار كورسیێن خواندنێ بۆ قوتابیان هاتینە دابینكرن و 105 قوتابیێن كوردستانێ ل زانكۆیێن ئیراقێ و 263 قوتابیێن ئیراقێ ژی ل زانكۆیێن كوردستانێ هاتینە وەرگرتن».
ناڤبری گۆتژی: «نوكە نێزیكی 85 زانكۆیێن تایبەت هەنە، ژ ڤێ هەژمارێ ل گەل 80 زانكۆیان مە چو ئاریشە نینن، ب تنێ پێنج زانكۆ نەبن، ئەو ژی ژ بەر هندێ كو ل وان دەڤەرێن ناكۆكی ل سەرن و ژ دەرڤەی ئیدارا هەرێما كوردستانێ نە و مە تێبینی ل سەر وان هەنە».
