وەزیرێ خواندنا بلند: ل نێزیك خواندنا ماستەر و دكتۆرایێ دێ هێتە ڤەكرن
دكتۆر ئارام محەمەد، وەزیرێ خویندنا بلند و ڤەكۆلینێن زانستی یێ هەرێما كوردستانێ دیار كر، د دەمەكێ نێزیك دا خواندنا ماستەر و دكتۆرایێ دێ هێتە ڤەكرن.
ناڤهاتی گۆت: «نوكە ئەم گەهشتینە قووناغێن دووماهییێ یێن هەلسەنگاندنێ و د دەمەكێ نێزیك دا خواندنا ماستەر و دكتۆرایێ جارەكا دی ل كوردستانێ دێ هێتە ڤەكرن، دیسا ل دووڤ وان هەلسەنگاندنێن زانستی یێن ل بەردەست، هەموو بەرهەڤی دهێنە كرن و د چەند رۆژێن بهێن دا ئەو پرۆسێسە دێ هێتە ئێكلاكرن».
دیسا ل دۆر گرتن یان ڤەكرنا هندەك پشكێن زانستی ل زانكۆیێن ئەهلی و گازندەیێن قوتابیان، وەزیرێ خواندنا بلند و ڤەكۆلینێن زانستی گۆت: «مە لیژنەیەك پێكئینایە بۆ دیاركرنا ئەگەرێ وان گازندەیان یێن كو پەیوەندی ب وەرگرتنا هەژمارەكا قوتابیان ڤە هەی د پشكێن زانستی دا، و هەلسەنگاندنا وان پشكێن زانستی یێن كو ل زانكۆیێن ئەهلی هاتینە ڤەكرن، مە بزاڤێن تەمام كرینە بۆ ڤەكرنا پشكێن زانستی، بەلێ دڤێت ل دووڤ وان رێكار و بنەمایێن زانستی بن، یێن وەزارەتێ پەسەند كرین».
