وەزیرێ ساخلەمیێ سەرەدانا پڕۆژەیێ نەخۆشخانا 100 تەختی ل ئامێدیێ كر
ئامێدیێ، مەحمد نهێلی:
سامان بەرزنجی، وەزیرێ ساخلەمیا حوكمەتا هەرێما كوردستانێ ب هەڤالینیا شاندەكی، كو پێك هاتبوون ژ بریكارێ وەزێرێ ساخلەمیێ و رێڤەبەرێ گشتی یێ ساخلەمیا پارێزگەها دهۆكێ سەرەدانا دەڤەرا ئامێدیێ كر و ژ نێزیك ئاگەهداری كارێ پڕۆژەیێ نەخۆشخانا 100 بوون ل كۆمەلگەها هێتووتێ یا سەر ب ناوچەداریا دێرەلۆكێ ڤە.
وەزیرێ ساخلەمیێ د كۆنگرەكێ رۆژنامەڤانی دا دیار كر، نەخۆشخانا 100 تەختی ل كۆمەلگەها هێتووتێ ل دەڤەرا ئامێدیێ، ئێك ژ وان خۆشخانایە یێن سەردەمێ كابینەیا جەنابێ مەسرۆر بارزانی بەرێ بنیاتی بۆ هاتیە دانان و گۆت: «نوكە قووناغا بجهئینانا ئاڤاهی بەرەڤ داویێ یە و د قووناغا ئامادەكرنێ دایە بۆ دابینكرنا ئامیرەیێن پێدڤی، وەك: ستی سكان و ئێمارایە و سونەر و نازۆر، مە داخواز كریە كو د داهاتی دا ئامیرەیێ قەستەرا دلی ژی بۆ ڤێ نەخۆشخانێ بهێتە دابینكرن، ژ بەركو ئەڤ دەڤەرە ژ لایێ جوگرافی ڤە یا دوورە ژ سەنتەرێ پارێزگەها دهۆكێ و چەندین ناوچەداری و گوندان ب خوەڤە دگریت، بەرنامێ كابینەیا نوو ئەڤە یە هەڤسنگیێ دروست بكەت بێ جوداهی خزمەگوزاریێن ساخلەمیێ بگەهنە هەموو دەڤەران».
سامان بەرزنجی، وەزیرێ ساخلەمیێ ناڤهاتی گۆتژی: «ئەڤ نەخۆشخانە گەلەكا باشە و شەش هۆلێن نشتەرگەریان هەنە و 100 تەخێن نەخۆشان و ژ چار نهومان و ژێر ئەردەكی پێكهاتیە، ل پشكا هەوارهاتنێ ژ بلی دو هۆلێن نشتەرگەریان دو هۆلێن هەوارهاتنێ هەنە، كو دێ پێشوازیا نەخۆشان كەن، دیسا خانیێن نۆشداران تێدا هەنە، كو ژ 36 شوقان پێك دهێت بۆ وێ یەكێ نۆشدرێن بسپۆر 24 دەمژمێران دا خزمەتا خەلكێ دەڤەرێ بكەن و ئەڤ پڕۆژەیە یێ تمامە ژ هەموو لایەكی ڤە».
سامان بەرزنجی، وەزیرێ ساخلەمیێ دیار ژی كر، ل هەموو جهەكێ وان پیڤەرێ دامەزراندنێ هەیە و ل ڤێ دەڤەرێ ژی دێ پێڤەبەرێ ئێكی ئاكنجیێن دەڤەرێ بن، كو ل ڤێرێ بمینن و خزمەتا ڤێ دەڤەرێ بكەن و گۆت: «راستە مە پێدڤی ب نۆشدارێن بسپۆر هەیە، بەلێ بۆ كارمەندێن ساخلەمیێ، مە هەژمارەكا زۆرا دەرچوویێن خەلكێ دەڤەرێ هەنە، كو چەندین سالە ب خوەبەخش كار دكەن، ئەم سۆزێ ددەین بەری ئەڤ نەخۆشخانە ب كەڤیتە كاری كارمەند بۆ بهێنە دامەزراندن و نەخۆشخانەیەكا مەزنە و دێ پێدڤی گەلەك كارمەندان بیت».
