وەزیرێ ساخلەمیێ: 98% كەرتێ دەرمانان ژ لایێ حكومەتێ ڤە هاتیە كۆنترۆلكرن
وەزیرێ ساخلەمیا حوكمەتا هەرێما كوردستانێ ئاماژەكر، پێدڤیە وەلاتی خۆ ژ كڕینا دەرمانێن ئۆنلاین بپارێزن و دبێژیت: د دەمێ نوكە دا هەتا رادەیەكێ باش كەرتێ دەرمانان هاتیە كۆنتڕۆلكرن.
دكتۆر سامان بەرزنجی، وەزیرێ ساخلەمیێ بۆ رۆژناما ئەڤرۆ دیاركر، د دەمێ نوكە دا 98%ێ كەرتێ دەرمانان ژ لایێ حوكمەتا هەرێما كوردستانێ ڤە هاتیە كۆنتڕۆلكرن و رێژەیا دەرمانێن قەچاخ د ناڤا بازاڕی دا زۆر كێم بوویە و گۆت: «هەر دەرمانەكێ ب رێیا كوالێتیا كۆنترۆلا دەرمانان نەهێتە پشكنین و ستیكەر پێڤە نەبیت جهێ باوەریێ نینە و پێدڤیە وەلاتی خۆ ژێ دوور بكەن، چونكی دەرمان ئەگەر ژ لایێ كۆنتڕۆلا كوالێتی ڤە نەهێتە پشكنین جهێ باوەریێ نینە».
دكتۆر سامان بەرزنجی گۆتژی: «دڤێت وەلاتی خۆ ژ كڕینا دەرمانان ب رێیا ئۆنلاین بپارێزن، ژ بەركو هەموو ئەو دەرمانێن ب رێیا ئۆنلاین دهێنە فرۆتن، مەترسینە بۆ سەر ساخلەمیا مرۆڤی و دەرمانەك ئەگەر یێ دروست بیت، ب ئاشكرا دێ هێتە فرۆتن نەك ئۆنلاین، ب تایبەتی هندەك جۆرێن دەرمانان هەنە وەكی یێن خۆ لاوازكرنێ و چەندین جۆرێن دی هەنە نابیت وەلاتی ب كاربینن».
