وەزیرێ پەروەردێ: 20 ملیۆن پرتووک بۆ سالا نوو یا خواندنێ ھاتینە چاپکرن
ئەڤرۆ نيوز:
وەزیرێ پەروەردا حوکمەتا ھەرێما کوردستانێ راگەھاند کو چار ھزار و 700 قوتابخانە ب رێیا سیستەمێ (ئایزۆ) د وەرزێ نوو یێ خواندنێ دا دێ پێکڤە ھێنە گرێدان و گۆت: “20 ملیۆن پرتووک بۆ سالا نوو یا خواندنێ 2018 – 2019 ھاتینە چاپکرن”.
د. پشتیوان سادق، وەزیرێ پەروەردا حوکمەتا ھەرێما کوردستانێ د کۆنگرەکێ رۆژنامەڤانی دا دیار کر کو بۆ سالا نوو یا خواندنێ 2018 – 2019 گوھۆرێنێن مەزن د پرۆگرامێن خواندنێ دا ھاتینەکرن و 20 ملیۆن پرتووک ژی بۆ ھەموو قووناغێن خواندنێ ھاتینە چاپکرن و ھژمارەکا مەزن یا قوتابخانان ژی ھاتینە نووژەنکرن و گۆت: ”بۆ وێ چەندێ قوتابخانە ل گەل شێوازێ سەردەم ب گۆنجن ئەڤ سالە بۆ جارا ئێکێ سیستەمێ ئایزۆ کو پێشکەفتیترین دێ ل قۆتابخانان ھێتە پەیرەوکرن و ب ڤێ چەندێ چار ھزار و 700 قوتابخانە دێ پێکڤە ھێنە گرێدان”.
ناڤھاتی ئاماژە دا وێ چەندێ کو ل رۆژا 2/10/2018ێ خواندنا کوردی دێ ل کەرکووکێ ژی دەست پێ کەت و بۆ ئەڤ سالە ژی وان ھاریکاریەکا باش یا مادی پێشکێشی قوتابخانێن کەرکووکێ کریە.
