وەلاتیەکێ خەلکێ فەلووجە ل ھەولێرێ ھاتە کوشتن
ئەڤرۆ نیۆز، قائید میرۆ:
ل باژێڕکێ شەقلاوە یێ سەر ب پارێزگەھا ھەولێرێ وەلاتیەکێ خەلکێ فەلووجە ھاتیە کوشتن و پۆلیسێن ھەولێرێ ژی ئاشکرا کر، تاوان ژلایێ زێرەڤانێ مۆتێلەکێ ھاتیە ئەنجامدان و تاوانبار ژی عەرەبە و خەلکێ مووسلە.
رائید ھۆگر عەزیز، پەیڤدارێ پۆلیسێن ھەولێرێ بۆ ئەڤرۆ نیۆز دیارکر” حەفتیا بۆری وەلاتیەکێ ب رەگەز عەرەب یێ خەلکێ فەلووجە ل سنورێ قەزا شەقلاوە یا پارێزگەھا ھەولێرێ بەرزە ببوو، بەلێ ھێزێن پۆلیسان شیان تەرمێ ئەڤی وەلاتی دناڤا مۆتێلەکا باژێڕکێ شەقلاوە دا ببینن، گورەی ڤەکۆلینێن دەستپێکی ئەڤ وەلاتیێ خەلکێ باژێڕێ فەلووجە ژلایێ کەسەکێ ب رەگەز عەرەب خەلکێ مووسلڤە ھاتیە کوشتن، کو تاوانبار زێرەڤانێ ھەمان مۆتێل بوو یا کو روویدان تێدا چێبووی.
پەیڤدارێ پۆلیسێن ھەولێرێ گۆتژی” تاوانباری تڕۆمبێلا زەلامێ فەلووجە دزیە و بەرەف جھەکێ نەدیار رەڤیە، بەلێ ڤەکۆلین ھاتینە دەستپێکرن و دێ بەردەوامن ھەتا گەھینە ئەنجامێن دووماھیێ.
رائید ھۆگر عەزیزی ئاماژە کر” رەوشا ئەمنیا قەزا شەقلاوە یا جێگیرە و ئەڤ روویدانا چێبووی تنێ د ناڤبەرا ھەر دو وەلاتیێن عەرەبدا بوویە، چونکی تاوانباری ب تەلەفۆنێ کەسێ کوشتی بریە مۆتێلێ و دووڤدا تاوان ئەنجام دایە.
