وەلاتێن جیهانێ داخوازا راگرتنا شەڕێ پاکستانێ و هندستانێ دکەن
شەڕێ د ناڤبەرا هندستانێ و پاکستانێ دا دژواتر لێ دهێت و ژ هەر دو ئالیان ب دەهان کەس هاتینە کوشتن و دوهی بەرپرسێن ئێکەتیا ئۆرۆپا داخواز ژ هەر دو وەلاتان کرن کو شەڕی راوەستین و پرسێن هەی ب رێیا دانوستاندنان چارەسەر بکەن.
وەزارەتا دەرڤە یا ئەمریکا دوهی راگەهاند وان دەست ب بزاڤێن خوە یێن دبلۆماسی کرینە دا شەڕێ د ناڤبەرا هندستانێ و پاکستانێ بهێتە راگرتن چونکی بەردەوامیا شەڕی دێ کاریگەریا خوە یا گەلەک خراب بۆ هەموو جیهانێ هەبیت.
وەزارەتا دەرڤە یا هندستانێ ژی راگەهاند ئەو بەرهەڤن ئالۆزیێن هەی کێم بکەن و ئێرشێن خوە بدەنە راگرتن، لێ دڤێت پاکستان ژی هەمان کاری بکەت و ئێرشێن خوە بدەتە راگرتن.
بەرپرسەکێ پاکستانێ ژی دیار کریە هندستان ئێرشی جهێن سڤیل یێ وەلاتێ وان کریە و گەلەک کەسێن سڤیل بووینە قوربانی، هندستان تاوانێن شەڕی ئەنجام داینە و دڤێت ئێرشێن خوە بدەتە راگرتن.
