وەلاتێ سـێڤان
عەدنان رێكانی
خەونا لبەر لێڤێن ئاڤێ..
بۆ خاترا وەلاتێ سێڤا،
ئەز ژ وەلاتێ بارانێ دەركەفتم..
چ دەم نەما ددەستێن مندا
دا خۆشتیڤیا خۆ ئاگەهدار بكەم
دا ب كراسێ ڤــــیزۆنی
بەژنا خۆیا رەش ریحان ب خەملینیت
و شالا رەش میرانی ل سەر
ملێن خۆیێن كوبار دانیت،
چاندكا من بارەكێ خەما یێ تێدا
بەس دبیت بۆ من یا ئەرزانە..
ئەو روومەتێ كەفتیە سەر ئاخەكا لیچ
لبەر لێڤێن ئاڤێ،
بلەز بەر ب من ڤە هات
دەستێن من وەك بالندەكی
چ تشت نەدگرتن .. و نەشیام هەلگرم
وەك بایەكێ فەراشین
لپشت دارەكا سپی دەركەفت،
گول نیسانۆك ل سەر تەختێ
من بشكڤین و خوناڤێ گرتن.
هەر رەنگەكێ سپی دارەكا
دییا رەنگاورەنگ ژێ دەركەفت
مە دڤیا ئەم ببین رەنگێ مرۆڤان،
جارەكا دی وەك زارۆك بەری بانگی
نڤـــــێژا رۆژهەلاتێ دێمێ تە بكەم.
ل گەل زمێن وزێــــــمارا دایكا رەبەن،
خیشالۆكێن خەونا خۆیا ڤەرســــتی
ل سەر پەردا ژیانێ دو تا كەم
دا كو بزانم چەوا سێڤ گەهشت و كەفت؟!
چونكی ئەو وەلاتێ ل هیڤیا دیتنا من
وەك خۆدیكەكا دژوار و پێتی
ب نانەكا شـــــــكەڤال نێچیر دكر..
