وەلاتێ شـــەنـگ

رەمەزان ئیسماعیل گەرەگوهی

ئەڤ وەلاتێ
هۆسا جوان و شەپال و شەنگ
بهارا وی یا ژێهاتی و
یا خەملی
ژ گول و کولیلکێن سۆر و سپی و
یێن هەمی ڕەنگ
ئەڤ خوەزایە کریە تابلۆ و
مینا رۆژێ بوویە شەبەنگ
خودانێن وی
ل بەر سیبەرا داربڕویێن وی و
ل ڕەخ رویبارێن
هەمی دەحل و بی و بیشەنگ
پێکڤە لێ دژین
بکەیف و شاهی و
بخوەشی وبێدەنگ
بێ ئاریشە و بێ گازندە و
گلە و ئاستەنگ
شەیدایێن وی
ژ نوکە وێڤە ڕێکێ نادەن
چو پاتەخۆر و چو دەبەنگ
نەژی فەلیتە و پێزەڤەنگ
خەملا جوانا
ڤی وەلاتی جارەکا دی
ب هزر و بیرێن خوەیێن بەرتەنگ
هەمیێ تێکدەن..
وەلاتێ شەنگ
ب ئاشقێن خوە یێن چەلەنگ
پێخەمەتی پاراستنا کولیلکێن وی
دێ هێنە دەنگ
بۆ مێژوویێ بنە سەمبول
بنە گول و چرا و جەڤەنگ..
نابیت ئێدی… جارەکا دی
نەحەزێن وی
نیشانێن خوە
ل هەمبێزا گۆڕستان و
پەرستگەھ و پیرۆزیا بکەن
شارستانی و دیرۆکا وی
ڤەگوهێزن، بخوە ببەن
گەنجینێن وی
ل هوندرێ
شکەفت و ناوسکا ڤالەبکەن
هێمایێن وی
ژ گۆڕستان و جهێن دێرین
ل خوە خڕڤەبکەن
بێ دەستویری
ل توخیبا بەرێڤەبکەن
نابیت ئێدی… جارەکا دی
مرۆڤێن وی
بێ ڕێز و بها و قیمەت بکەن
بهارا وی بکوزرینن
جوانیا کولیلکا بمرینن
گولێن سۆرێن بەتەنێن وی
هشک و زەربکەن
شوینەوارێن پێغەمبەرا
بێ ڕوومەت و سەروبەربکەن.

کۆمێنتا تە