وەهبی رەسۆل: ل كوردستانێ هونەرێ شێوەكاری ل بەراهیا هەموو هونەرێن دیترە
ئەڤرۆ، زنار تۆڤی:
شێوەكار وەهبی رەسۆل ئەحمەد، خەلكێ باژێرێ سلێمانیێ یە، ل سالا 1986 ێ، ئەكادیمیا هونەرێن جوان ل بەغدا پشكا شێوەكاری تەمامكریە، ل سالا 2008 ێ، باوەرناما ماستەرێ ل كۆلیژا هونەرێن جوان ل زانكۆیا سلێمانیێ وەرگرتیە و هەتا نوكە چەندین پێشانگەهێن شێوەكاری ڤەكرینە، د دیدارەكێ دا بۆ رۆژناما ئەڤرۆ دبێژیت: د ئەڤ سالە دا وی پشكداری د خۆلا 15 ێ یا گەلەریا دهۆكێ دا كریە، ئەو دخوازیت گەلەریا دهۆكێ ل سەر ڤی ئاستی یا بەردەوام بیت، ئەو گەلەك یێ رازی بوو ژ وان كارێن هونەری یێن دناڤا گەلەریا دهۆكێ دا هاتینە نیشاندان، هیڤیا وی ئەوە، بۆ خۆلێن بهێن ژی د هەمان ئاستێ خوە دا بیت و بەرفرەهتر ژی لێ بهێت و هەموو شێوەكارێن كورد یێن خۆدان شیان پشكدارییێ تێدا بكەن.
ناڤهاتی گۆت ژی: بەری نوكە د خۆلا 10 ێ دا یا گەلەریا دهۆك دا من پشكداری تێدا كریە، لێ ڤێ جارێ كارێن گەلەك باش هاتینە ئەنجامدان و نیشاندان، ئەز گەلەك یێ گەشبینم ب هونەرێ شێوەكاری ل كوردستانێ و ب تایبەتی ژی ل باژێرێ دهۆكێ، هەروەسا ئەو كارێن دهێنە ئەنجامدان ژی دەربرینێ ژ جڤاكێ كوردی و ئێش و ئازارێن خەلكێ كوردستانێ دكەن، د چ بیاڤان دا هونەر و ئەدەبێ كوردی نەشیایە بگەهیتە وی ئاستێ ئەڤرۆ هونەرێ شێوەكاری یێ كوردی ل هەرێما كوردستانێ گەهشتیێ.
ناڤهاتی هێشتا دبێژیت: هەتا نوكە وی 18 خەلات و باوەرنامە د وارێ كاركرنا هونەری و نڤێسینا رەخنا هونەری دا وەرگرتینە، د هەمان دەمدا هەتا نوكە وی 12 پرتووك ژی د بیاڤێن جۆدا یێن هونەری دا چاپكرینە، هەروەسا چەندین سمینار دەربارەیی مێژوویا شێوەكارێن كورد پێشكێش كرینە ل كۆلێژێن هونەری یێن زانكۆیا لەندەن ل بریتانیا و چەند پێگەهێن هونەری یێن تایبەت ل وەلاتێن بریتانییا و ئەلمانییا و فرەنسا.
