وەهبی سلێمان: شانازیێ دبەم ئێكەم كوردستانی بم ناسناڤێ شینگهای ب دەستڤە بینم
د دیدارەكێ دا وەهبی سلێمان كوڕێ پارێزگەها دهۆكێ و یاریزانێ هەلبژارتیێ ئیراقێ و یانەیا سیناعە یا بەغدایی كەیفخوەشیا خوە دیار كر پشتی ناسناڤێ قارەمانییا شینگاهای یا چینی یا نێڤدەولەتی یا ڤەكری ب دەستڤە بینت و ڕژدییا خوە دیاركر دێ ل سەر دەستڤە ئینانا ناسناڤان بەردەوامبیت، ئەڤچەندە هات پشتی شیایی ل حەفتییا بۆری ناسناڤێ قارەمانیا شینگهایی ل وەلاتێ چینێ ب دەستڤە بینت، پشتی د بەریكانەیا 70كم دا ل رێزا ئێكێ دهاتی، د هەڤڕكیێن وان دا ئەوا بۆ كۆمەكا یاریزانێن نافخوە و دەرڤە هاتییە ڕێكخستن.
ناڤهاتی ئەوچەندە ژی گۆت: هەرچەندە وەكو یاریزانێن هەلبژارتیێ ئیراقێ بۆ مە كەمپەكێ ڕاهێنانێ یێ بوو ماوەیێ مەهەكێ ل باژێرێ شینگهای دانابوو خوە بەرهەڤكرن بۆ كۆپا ئاسیا 2026و ڤاڤارتنێن مۆندیالا جیهانی2027ێ، ل دووڤ بەرنامەیەكێ ڕێكخستی ئەم هاتینە داخوازكرن بۆ قارەمانییا نافخۆ ل چینێ، من بخوە ب دەلیڤە دیت ئەز پشكداربن پێخەمەت مفایی ژێ وەربگرم، لێ ڕژد بووم ژی هەڤڕكیێ ل سەر رێزێن پێشیێ بكەم، پشتی هەڤڕكی دگەل چەند یاریزانێن دەرڤە و نافخۆیی كرین شیام ڕێزا ئێكێ بهێت بۆ بەریكانەیا 70كم.
وەهبی سلێمانی گۆت: شانازیێ پێ دبەم و یا گرنگ ئەو بوو كو كوڕەكێ كوردستانێ بشێت ناسناڤەكێ كێم وێنە ل وەلاتەكێ وەكو چینێ ب دەستڤە بینت، ئەڤە ژی دێ بیتە باشترین پالدەر بۆ من باشتر و مۆرالەكا بلند خوە بۆ قارەمانییا ئاسیا و ڤاڤارتنێن مۆندیالا جیهانی بكەت، دیسان باوەری بۆ من و ڕاهێنەرێ من یێ ئیراقێ پەیدابكەت بێ دودلی شەڕی بۆ هەر ناسناڤەكی جیهانی ژی بكەم، ژبیر نەكەین دڤێت بەردەوام ئاستێ خوە پێشبێخم و هزرا باشتر هەبیت.
ل دووماهیێ كوڕێ باژێرێ دهۆكێ هیڤی خواست هەموو یاریزان باوەری ب شیانێن خوە هەبن و هیچ رۆژەكێ دەستان ژ ئارمانج و ئۆمێدێن خوە بەرنەدەن و گۆت: مە ل كوردستانێ ب گشتی و پارێ.گەها دهۆكێ ب تایبەت یاریزانێن خودان شیان هەنە هیڤییا مە ئەوە پشتەڤانییا وان بهێتە كرن و یاریزان ژی بلا دەستان ژ هیڤیێن خوە بەرنەدەن.
