وەهبی سلێمان ل چینێ بوو قارەمان
دقارەمانییەكا تایبەت و كێم وێنە دا وەهبی سلێمان كوڕێ پارێزگەها دهۆكێ و یاریزانێ هەلبژارتیێ ئیراقێ و یانەیا سیناعە یا بەغدایی ناسناڤێ قارەمانیەكا نافخۆ یا ڤەكری ل وەلاتێ چینێ ب دەستڤە بینت، پشتی ل رێزا ئێكێ دهاتی، د هەڤڕكیێن واندا ئێكشەمبییا بۆری ژلایێ فدراسیۆنا وەلاتێ چینێ بۆ كۆمەكا یاریزانێن نافخوە و دەرڤە دانایی.
تارق سەعید ڕاهێنەرێ هەلبژارتیێ ئیراقێ و كوڕێ باژێرێ دهۆكێ بۆ رۆژنامەیا ئەڤرۆ دیار كر، وەهبی سلێمان بۆ ماوەیێ نێزیكی سێ حەفتییانە ل وەلاتێ چینێ دگەل هەڤالێ خوە مورتەزا حەیدەر د چارچووڤەیێ كەمپەكێ ڕاهێنانێ دا ئەوا دێ بۆ ماوەیێ مەهەكێ ڤەكێشیت خوە بەرهەڤكرن بۆ كۆپا ئاسیا 2026و ڤاڤارتنێن مۆندیالا جیهانی2027ێ، ل دووڤ بەرنامەیەكێ ڕێكخستی وەهبی پشكداری د قارەمانییەكا ڤەكری یا نافخۆیا وەلاتێ چینێ بۆ باژێرەكی دا كر، پشتی هەڤڕكی دگەل چەند یاریزانێن دەرڤە و نافخۆیی كرین شیا ڕێزا ئێكێ بهێت و میدالییەكێ ب دەستڤە بینت.
هەروەسان ناڤهاتی گۆت: هەرچەندە قارەمانییەكا هەڤالینی یە و چو پەیوەندی ب یێن فەرمی ڤە نینن نە ل چینێ و نە نێڤدەولەتی لێ یا گرنگ كوڕەكێ كوردستانێ بشێت ناسناڤەكێ كێم وێنە ل وەلاتەكێ وەكو چینێ ب دەستڤە بینت، ئەڤە ژی دێ بیتە باشترین پالدەر بۆ وەهبی سلێمان ئەو ب مۆرالەك و زاخەكا بلند خوە بۆ قارەمانییا ئاسیا و ڤاڤارتنێن مۆندیالا جیهانی بكەت، مە ژی باوەری ب شیانێن وی هەنە كو دێ بیتە ئێك ژ باشترین یاریزان ل سەر ئاستێ عەرەبی و ئاسیا.
تارق سەعید كو هەڤدەمدا ڕاهێنەرێ یانەیا دهۆكێ یە گۆت: كەمپێ ڕاهێنانێ یێ یاریزانێ كوردستانی دگەل هەڤالێ وی خوە بەرهەڤكرنە بۆ كۆپا ئاسیا 2026ێ ئەوا دێ ل وەلاتێ سعۆدیێ هێتە كرن و ڤاڤارتنێن مۆندیالا جیهانی 2027 ل چینێ و ڤاڤارتنێن ئۆلمپیادا 2028ێ یە، پێنەڤێت ئەڤە وەكو پرۆژەیەكێ دووم درێژە و گەشبیینە بۆ دەستڤەئینانا ئەنجامێن باش.
هەروەسان ناڤهاتی ئەڤچەندە ژی گۆت: وەهبی سلێمان ئێك ژ یاریزانێن مەیە كو حەز و ڤیان و بەهرەیەكا باش ل دەڤ هەیە و هەكە بەردەوامبیت و پشتەڤانی بۆ هەبیت شیانێن نێڤدەولەتی ژی یا هەی، بدیتنا من ل پارێزگەها دهۆكێ مە كۆمەكا دی یا یاریزانێن وەكو وەهبی هەنە هەكە پشتەڤانی بۆ هەبیت دێ ل سەر ئاستێن ئاسیا و نێڤدەولەتی ژی دیاربن و پشكداریێن سەرفەراز هەبن.
